Wie fühlt sich äch de Morge aa, d Sunne zeigt sich langsam am Grat.
D Bärge zeige sich i voller pracht,
Nimeni denn der lescht Chilchegloggeschlag war, 
Ischs mir denn klar, we die leschti Stund isch aabroche.
Was chönnti, würdi nu tue we der Zeiger es leschts mal sini Rundi dreit.
Hetti als gmacht woni mer ha ertrümt oder berüienis, ned me ha z ta, us däne täg. 
All die Kämpf wo eim hi plaget u gformet, 
Hei sich die glohnt?
Hani mi z fescht belohnt für all das woni z gfüehl ha ka, i higis richtig gmacht. 
Hets es Füür entfacht i paar Menscheseelene oder hani me verdorbe als gseeit. 
Die Gedanke schwirre mir so düre Chopf, während d Nachbarschind unbeschwert fröhlig vor sig hii spiele u mi i mine Gedanke lö la schwelge. 
Viel Frage wenig Antworte, i glube i muess dass hie uf Papier bringe.
Wie seit me so schön "Rede isch Silber u schribe isch Gold".
Irgend so öppis muess es si gsii, so passeni paar Gedanke i die forme wo grad passe.
Wasi sicher würd säge weni wüssti dases das isch gsi, isch Danke.
I bi dir dankbar, Dankbar für die kreativi Adere.
Dankbar für die etliche Gsichter u Gschichte wo dür mini Linse, die Stube u Gallerie schmücke.
I ha dörfe lehre Meinige aaznäh u we mir de öpper z Gfüehl het gäh er wüssi besser bschiid über mii, hanis chönne la stah.
Danke für die etliche Tipps wo ned viel hi gnützt, i ha si churz u bündig, bündlet im Estrich.
I chami scho nume nu Stichwortartig dra erinnere wasi vor paar ziile ha gschribe.
Was mir da derbii isch blibe.
Ds guete überwiegt, i ha dörfe lehre z Liebe, a Mensche wo mirs eifach u anderi wos mer schwer hi gmacht. 
I ha dörfe z Gfüehl ha öpper z si, i dire Wält.
I ha dörfe entdecke wie viel Wärt es het z vergäh.
All die Fotos hani dörfe mache wo ihre Wärt ned verliere sondern bhalte.
A däm Standpunkt jitz chani dir säge,
I bi im Friede, mit mir sälber.
I la die Gedanke chli la zieh, wie der Tee i mim Tassli.
Miner Gedanke tribe mi uf ds "Floss" wo über d Chopfhörer i miner Ohre tribt, sit I der Stift ha aagleit.
I nime die Fläsche i d Hand, schmeisse se i Gedanke wiit usi i ds Wasser. 
Läse chas wer se findet u verstiit was Gschribes bedütet.

-Diego Bircher