Dr Rosegarte, Zytgloggeglütt,
Chornhuuschäller, Sous-Chef,
Sandsteiimuure, Bäregrabe,
Trochni Lunge, Rouch belastet,
Teereti Lethargie, herts Pflaster,
Rotwiiwohlige Goume,
Summer Somelier,
Lilarots Wolkemeer, Purple Rain,
Trinke lieber ä Schluck,
als ufem Trochne blibe z'sitze.
Ha Angst das sich hie alls uflöst u mir zwüsche de Händ verfliesst,
Bringi mis leschte Teili Seel i ds trochene?
Mir aa wohl, Trinki o usemne Trüebe Glas,
Houptsach Farbig, chli wie Berri, Purpurrot,
Chli Wii, Berrig, Gèrard Bertrand.
Chli Saint- Chinian, Mourvèdreu Syrahtrube,
Chli Pfluumegschmack,
Flüssigi Wiiberri im Glas,
Chli Farb für das Neutral.
Chli Chuck Berry i de Ohre,
ds Chirschi ufer Turte.
Fingerabdrück sammle ds Glas
u gäh me ä Touch, Einzigartigkeit.
Wett Fiire, z'läbe gniesse ir Fülli vom sii,
Bi ä Tröimer aber cha nid Schlafe,
Tröim hani vieli vom Füehle u schaffe,
Falschi Ziit, Falsche Ort, Richtig dernäbe.
Es schinnt wiit wäg als wers e anderi Gala gsi,
Mini Gedanke träie bis ii Schlafe,
Der Müeder liegt nach, tröim witer.
Nume paar Pille für d'Ouge z'schliesse,
ke Erholig, we sich d'Ouge öffne.
Frage mii, Läbi inere Symbiose?
Danki im Gebätt, oder Bitti nume,
Dänke ii Danke, Dänk ii Gedanke,
Gedänkt ii Gedanke, Gedänkt ii Vergangä,
Vergiengi ds Vergangne, Läbti Gägewärtig.
Läbti Gägewärtig, müesst i mii nume Zuekünftig sorge, de weri im Hie u Jitz.
Sorge mii um was isch gsi,
Vergeit ds Vergangne Leid, irgendwenn?
Schribe Vergange, wie Zuekünftig,
öppis Komplexes, Schribes wienis meine.
Wünschti du wüsstisch wienis wetti säge,
wenis uf Blatt Schribe.
Köres im innere Ohr weni Schribe,
Wünschti ii chönntis säge wienis Schribe,
Wünschti ii chönntis Betone, wieni wett,
De Wüsstisch du wienis wetti gseit ha,
Wünschti es würd kört wärde, wienis meinti,
als wers Eigetum, das wer mii Wunsch.
Wünscht ii meh Wünsch, wers es Wunschkonzärt u simer ehrlig,
de wers nume nu ä Vorstellig.
Schlafe mit mine Ängst u mire Depression,
Versueche d'Dunkelheit i Schatte z'stelle.
Bi ufer Sunnsiite gebore, ha d'Schattsiite nume vo äne gseh, jitz het sich die Schattewält i mir iiprägt.
Viel meine Schattesiite giits nume we d'Sunne schinnt, schinnt d'Sunne wirft sii Schätte.
Was we Dunkelheit o Schatte cha wärfe.
Dunkel kenneni i allne Facette, wienes Tuech bedeckt mii d'Depression.
D'Sunne schinnt unermüedlich, vo usse gseh, es chunnt nüd aa, vo inne gseh.
D'Gedanke absorbiere ds Liecht wie Vantaschwarzi Farb.
Ds Überläbenselexier, Liecht,
liecht gseit schwer umgsetzt.
Als hets mir abglöscht, füehle mii wie usdräihts Orange, der Saft entzoge, nume
chli Fruchtfleischfätze wo übrig blibbe sii.
Säg mir di Träne ir Nacht si nid verlore gange,
Nume will ii si nüm gseh u nem Füehle.
Nid jedes Liecht isch liecht,
mängisch isches z'Gräll, ds Farbig,
Z Gäll, als müessti mir im Gspräch mit dir bestätigung hole, wasi säge.
Jedi Träne sött dörfe vergosse wärde,
bis z'lescht, mire Meinig nach,
Bi Wundempfindlich, chli Hochsensibel.
Mensche erschaffe Rächt,
Schlächt u Guet u dis Rächt.
Lege derfür z'wenig Rächeschaft ab.
Fürnes reins Gwüsse bruchts hüt nume
chli zuestimmig vo wäm o immer.
Jede Mensch het z'Rächt kört z'wärde,
Jede Mensch het Würde verdient, i mire Wält.
Ds Läbe sött guet sii, kes Güetzi,
O we mes so im Wallis seit.
Versueches Glasse z'näh,
Chli wie Erdbeersorbet u Kokos mit Splitter
drin, ir Gelateria ds Como am See.

-Diego Bircher