Küstelinie, Dunkle Steii,
Rägetropfegruch, ä Grüene Mantel ann.
Wätterwächsel all halb Stund, bii im Norde.
Boumrindegschmack, Frisches Gras.
Zünd das Füür aa, mini Cherze brönnt ache,
Wachswasser, Gsprätzlete Docht, Orangerot,
Schwarze Rouch, Wulchewullig,
Als weri ds Pächschwarze Schaf ir Wisse Härde uf er Wiese usse.
Überchume Chalti Füess bi däm Rägewätter, D'Wulle sugt ds Wasser uf,
Ii verfliesse wie alls wo mir lieb isch,
Mini Ouge Träne, mini Seel schreit,
Mini Gedanke schlüdere mii id Todesangst,
Wett däne Motivationssprüch, Chraft entzieh, aber es entzieht mir d'Chraft derfür.
I stah vor mim Leere Ersatzteillager,
Die Teili sii nüm da, die meischte Teile fähle.
Bini ä Teil vor Lösig oder vom Problem,
Chani dermit läbe we ii z'Problem darstelle.
Es würd Düster, ha die Gedanke siit Füfzähnii,
Schwarzi Wolche umgäh mii einisch meh.
Schattegstalte chere mir der Rügge zueh,
es sött heller wärde oder? Sicher nid Dünkler.
Bii Gfange wie d'Flamme am Docht.
D'Medis nütze nid gnue gäg die Angst,
bruchi meh oder weniger, was wer we?
Wie füehlte sich die Emotione ungfilteret aa? Therapieri mis Spiegelbild under Medis oder bringts mir öppis?
Was weni morn vor verschlossne Türe stah?
Mis Läbe isch grad wie ä Adventskaländer, jede Tag chunnt ä Nüiie Tag füre,
Rede vo dene Täg vo denn.
Die Gfüehl womi hei zu dem gmacht wasi bi,
Haltes nid us, schreie sii Name, es chunnt ke Antwort, hani Friede u isch das guet? Understützts nume d'Suizidgedanke oder hilfts, brucht Gott mii, bruchi ihn?
Hani das Leid verdient?
Bini gnue oder gnüegi nie?
Machi Z'viel, Läbeni zwenig?
Zahlt sich das us,
oder geit ds Gäld vorhär flötte?
Bring mii usem Töifflug,
wott i d'Alpe nid alls hinderfrage,
aber alls hinder mir lah.
Was we mii die Bärge verdrücke u iiänge,
Läbeni scho oder Stirbi so?
Ha Frage a Frage u Antworte cha mir niemer.
Chiichä, bi jeder Bewegig, Stress ufglöst.
Cortisolspiegel geit ufe,
ha es Bluet überströmts Härz, bii ufglösst.
Dopamin usgschosse, ke Schuss troffe,
D'Ouge gschlosse, Zwöi Chugle im Chopf,
wo gseh was ii nid wott gseh,
Neurone zerlöchere mis Hirn u d'Outobahn
i mir inn, u die sölli ersetzte mitemne Trampelpfad, wo macht das Sinn.
Ds Läbe Spieglet sich i mine Ouge, lääri.
Gseh mers aa, tief drin isch viel versteckt,
Verletzt, versetzt, verkeiit, zerstört.
Mini Ouge spiegle d'Seel.
Sii Lüchte nüm, als hets däm Spiegel ä Meissel i ds Härz tribe.
Versueche däne Schärbe chlii Glück u Sinn z'entzieh, verbildlicht imne Simon Berger Bild.
Tue so als wer ds Dunkel s' Art Stübli,
Schöpfe us läärem Brunne,
Mini Depression isch Schwarz i allne Facette.
Ds Schribe wie mii Schöpflöffel.
Der Brunne töif gnue für drin z'versinke.
Ds Hirn macht ee wases wott u
d'Gedanke versinke im Eländ.
Es Lache zur verdrängig,
vor Schwarze Wolke im Chopf,
D'Fröid ganz minersiits, Vorgspielt.
Ha ä Vertrag mit Gott u mire Frou,
Verbindlich bis a ds Änd,
wenn o immer das würd sii, weisi nid.
Wett am liebschte ds Aberot usdrücke als wers ä Bruetorange.
Chlii Saft u Farb im Läbe, tät mir guet.

-Diego Bircher