Saftigi Bluetorange, Derrti Fiige
Blüeteziit, Una Mattina,
Verbotteni Frücht, Wiisheitsbäum,
Klaviertastechleid, Hebelwürkigsgsetz,
Verdorbeni Grüch, verkorkte Wii,
Hymnischi Psalme, Hoffnig für Erlösig.
Ohreschmuck, Dornechronegstrüpp,
Läbe u Tod, Oug um Oug,
Luftlos Lääri Rüüm, Halbtot läbig,
Todesstilli übertönt Engelsstimme.
Usrutschgfahr i mim Härz,
Chöttepflicht, mi Stolperpfad,
Tuubefriede, Bluetroti lääri i mim Härz.
Wissi Robe, Schwarzi Rabe,
Zungesprache, Geister gfahre,
Gheilti Seele, Garte Eden.
Schwarz u Wiss, s'giit kes Grau,
bi viel Chrischte, Hans, was Heiri?
D'Chelti vo mim Härz,
übertönt d'wermi vom Bluet.
Z'Läbe geiter witer, wienes Lied,
Ä Melodie, ä Bach vo Gfüehl wo iifriert,
i mim Winter-venewunderland.
Hoffe scho glii uf z'End vo mire Winterstarri, d'Schneeschmelzii ir Frühligssunne.
Ha mit paar Jahr alt, für paar Jahr zahlt.
Ds Lache nem gfüehlt, siit Chlii.
Es isch jitz mii Bewältigungsmodus,
vo de Gfüehl.
Denke alls z'Tod u hoffe über
Läbe u Tod entscheidet am End, Gott.
Ha glehrt nume Toteschädle lache ewig.
Füehlt sich aa als wer mis Härz a de Lungevene usegrisse worde,
vo mine beste Fründe, ä Schmärzhafti Tortur.
Innerhalb vo Drüü Jahr, wie ä Härzoperation.
Der Abgrund gschaffe, alls i mii inne gfrässe,
bi wiit wäg vo mine Bedürfniss.
Höchii Muure, Bachsteiigstaplet,
für ines Töifs nüd inne z'Blicke, mini Seel.
Bi sälber driigstürzt, Wiit ache woni ke Griff me ha i däne Wänd, Rutsche ab bi jedem Griff.
Anerchennig, Glück u Liebi vergeit mir zwüsche de Händ, als giebses nume einisch.
Ha verlehrt z'griffe nach Erfüllig, Sälbstwärt u Fürsorg für mis Härz.
Uss de Ouge isch oft nid usem Sinn,
Verdränge chame viel, we der Tag läng isch.
Gstresst suechi nach Lösige im Dunkle.
Mir geit d'luft us ar Waldobergränze,
sött nu ufe Bärggipfel ueche möge seckle.
Mii Gfüehlsbetont Marathon.
Ma nüm Spure bi ke Skitoureführer.
Bi mir z'höche nid gwöhnt wie e Stedter.
Unussgsprochni Wörter, schaffe Macht u Wäge, Verstecke sich wie Dunkli Gstalte u Macheschafte hinderem Vorhang vor Stilli.
Sie verhöhne di vorem Schoulustige Publikum.
Brot u Spiel für Dämone innedrin.
Wed dii im Dunkel nid uskennsch,
seisch Floskle, ir hoffnig sii gäbe Orientierig.
Sii zerstöre meh, als sii hälfe.
Sie understütze nume ds Verdränge,
i de verschiedenste Arte.
Es giit nume Methodi, wie im Chrieg,
dass mä alls cha vergässe, was isch gsii.
Vermidig, Überkompensation u Underwärfig, sii wie ä Dechi wo mi schütze, vor mir sälber.
Mini Seel Schmärzt, mis Härz tuet Weh,
es chläbt fest, pumpet kes Gold, ke Wärt woni gseh, nume Emotione woni nid kenne.
Lehre glehrt, wo mi lehre nid ds Leere, sälbst we z'Fass überlouft söllsch nid wüetig wärde.
Ä Reini Weste bringt nüd bi Dräckigi Finger.
Wuet wie Träne für Männer,
Gsellschaftlich nid gärn gseh.
D'Same woni gsäit ha, si d'Narbe vo mir Seele.
Chöiie uf mine Problem ume,
bisse mir d'Zähnd use, als chönnti der Sterchscht Muskel für nüd anders bruche.
Schiebes uuf siit Jahre, jitz Schribis uf.
Gschribes wie es offnigs Ohr,
we d'Gedanke z' luutstarch wärde.
Seckle de Stimme dervoo, als giebs e Uswäg, es Morn, Ds Exit vo de trüebe Gedanke.
Schaffe Wörter wie e Linguistikdozänt.
Wett d'Dämmerig nütze bevors Iinachtet,
mit chli Lyrik, als Liecht.
Es chliis, Du bisch nid alleini o wed dii Einsam füehlsch ir Gsellschaft,
Bevor mis Läbensliecht es leschts mal ufgeit u wie e Stichflamme mit zweni Suurstoff erlischt, u mii verlaht id Todesstilli, hoffe dert obe wartet Erfüllig u d'Himmelstor hei offe, weni dervor stah.
Ds Erb vom Läbe, isch der Tod u im beste Fall öppis Ewigs, für geng.
So stützi mini Händ uf däre Armlehne uuf u Bätte, das mini Gfüehl der Wäg finde zu mir.
Gah Schritt für Schritt als wers ä Fortschritt.
Hoffe bis z'lescht chunnts guet,
Hoffe es wird Rächt gsproche,
als wers die leschti Siite vor Bibel.
Schribe Zille als weri, Wortgschritte.

- Diego Bircher