Im Herbst hani gmerkt,
Dases mii plaget het, siit Jahre,
Ha gwüsst dass wird mini letschti Chance,
Ke Überflüger, Simon Ammann.
Ds Läbe isch ä Prachtstrass,
Avenue des Champs Élysées.
Muess mii Intensiv beschäftige mit mir,
Liese was i nid weiss,
Texte wasi nid Verstah für Sätz z'Kreiere wo d'Mehrheit nid versteit u se zum Verzwifle bringt, wie Mathematiker.
Nid alls isch Statisch, es giit Usnahmefäll nid alls Schwarz- Wiss, Chalt- Heiss, villich ischs ja grad Grau bis Leuuwarm.
Meh muess über alls chönne dörfe Rede, süsch wirds Underdrückt, bruche es Überdruckventil, woni alls cha uselah.
Underdruck enzieht dir Luft.
Under Druck enziehni mii lieber däne Sache u schliesse ab, wie alti Verhaltensmuster.
Süsch platzi u nimme z'viel Platz ii, ufere z'grosse Liinwand, wo mir nid zuesteit.
Gib mir chli Privatunttericht, bruche chli Lektione im nid immer mit allem z'Rächne.
Krass was alls uffallt we meh entscheidige trifft, für sich.
Meh gseht ds Bild vom Umfäld, imne ganz andere Liecht, nid nume Guet, das isch nid nume Schlächt.
Las lah usgseh wiene Unfall, hani dänkt, aber nid usgfüehrt.
Gib nume grad däre Underhaltig platz hie,
dases Nachehallt.
Chume nid eifach drüber hinwäg, wie binere Underfüehrig.
Ds Läbe hie, isch Stärbe ufem Höche Niveau.
Trotz mim Sichere Ufträtte, bini Unsicher.
Chasch bitte diner Schueh abträtte bevor die Lyrikgallerie tuesch beträtte.
Hie louft nid alls Suber wie ii Abwäschmaschine.
Hie isch der Ablouf chli Trüeb, aber es wird mit Frischem Wasser nachegspüelt, versproche.
O wes eim chli Stinke tuet,
Chli Stinke muesses, vertrou mir,
Das muess Er tragä wie Mehrwägtäsche im Coop o wes nume Vierzg Rappe sii.
Es isch schwierig z'Läbe so,
öppe so wie der Heuhuffe z'finde im Gufer.
Aber es isch Wärt ds beste z'gäh.
Jede het Dräck a de Schueh, jede muess luege wie er das wäggüberchunnt,
Wie Düringmitarbeiter ufem Festivalglände.
Mängisch blibt Scheisse chläbe wo nid vo dir isch, du aber muesch usbade.
Oft geits drum Verantwortig z'übernäh,
o wemes nid verschuldet het, wie im Militär.
Ds Gsellschaftsverhalte isch üsi Kollektivbestraffig für z'Underdrücke vo Themene wo mir nid wei drüber Rede, stattdesse tüe mir Dänke, Underdrücke u Danke seit üs glich ä keine.
Depressione spiele dir öppis vor wie Filmakteure i viel z'Schnälle Autos.
Läbe schnäll u Hässig,
Boue Bridges statt Gränze,
Bi nume ä chline Teil vom ganze Grosse, Chrischtliche Chueche, ä Randerschinig.
Im Grosse u ganze, nume ä Grossi Masse a Gedankevollume, wo Grössi misst a Arroganz u Sälbstverliebtheit.
Schluss u Endlich geits ume Vibe,
Ds Läbe z'Läbe u ds Stärbe z'akzeptiere.
Kompetenz zur Akzeptanz, nenni das,
Tönt schreg isch aber Wahr.
Freiheit isch Ersträbenswärt aber oft nid ächt.
Es isch wie Flyer, Akkurat, z'dänke das Perfektion üs söll leite id Freiheit vom Läbe.
Aber wo Perfektion herrscht, giits keni Verbesserigsmüglichkeite u das wer ja ner Gott weiss wämm sis Problem.
Z'viel sträbe nach dem Läbe ir Freiheit u verföh sich im eigete Gedankegflächt, wo se iiängt u begränzt fürne gwüssi Ziit, bis Sie lehre los z'lah.
D'Schwierigkeit glich d'Zügel i dä Händ z'bhalte u bereit sii ds Läbe, Liebi, Gfüehl u d'Ächtheit zuezlah o wes weh tuet.
Dini Liebi isch Lieb gmeint aber oft verletzend u das isch Liebi nid.
Also fragii mii Liebi de oder Liebi nid,
Nimmeni nume drus oder gibeni o drii,
Schöpfi mis Potenzial us oder äbe nid.
Villich bini für immer niemer, isch mir egal, Affe tod klappe zue.
Mii Psychozirkus zieht sich witer, wie der Schnitzelname z'Dütschland.
Es isch z'töif ir Gsellschaft verankeret wie der Abergloube, Fritig, Driizäh, d'Religiösität, z meine i allem Rächt, ä Meinig müesse z'ha u die nu mitzteile, Arroganz halt.
Wahrsagerii isch O Kult, aber destwäge nid Automatisch guet.
Es paar Parts woni vor mii hii spitte, wie Panflötesöifer befüechti die Texte mit Bluet, Schweiss u Träne.
Ha Fragestellige wie Offiziere,
Gränne d'Soldate nume Nachts oder gseht mes über Tag nid will d'Tarnfarb nid verschlargget, bi chli Ougetränewasser u Dräck im Gsicht.
Schrifte wo blibe bis i ds Ewig schribes,
Gschichte u Bilder verzelle dir meh als mir wei, sie tangiere u rege üses Dänke aa.
La dii la Inspiriere, Bis dir nid z'Schad, mis Motto vom Zwänzgvierezwänzg.
Bilder wo Gschichtet uf Papier verharre wiit drüber use, als d'Erinnerig tuet verwile si Läbenswichtig, für sich z'Erinnere wo me härchunnt.
Sueche mii sälber zwüsche Verstoubte Albe, woni ha aagluegt albe.
Finde mi Name wieder imne gmisch us Säbelzahntigere, Fuessballerspieler u d'Hand Gottes, blibe blessed o weni mii verändere u trenne vom alte Ig wo mii i die Depression het gfüehrt, das het mii Name versproche.
We du Mensche wosch verändere, de muesch se Liebe u di Iifluss geit nume so wiit wie dini Liebi reicht.
Es Quote zum Abschluss.
Das isch ds Wort zum Tag wo das lisisch.

-Diego Bircher