Süesslich; Der Gschmack vo derrtem Fiigefruchtfleisch liegt mir ufer Zunge u zwüsch de Zähnd,
wie paar Wörter für ds Schribe ufem Härz,
der Schmärz ir Brust,
was wosch nu meh, als der Stift i de Händ.
Wed nid Feig sii, wie der Räschte,
i mim Muul, drum schribis uf,
u schlückes nid ache.
Was mi bewegt u wies tuet?
Wirde viel gfragt, aber d'Chraft
z'Antworte blibt us, sorry.
Telefoniere im Moment e Hürde,
Kes problem wed probiersch,
häb eifach verständnis,
wenis nid schaffe, abznäh
isch e unagnähmi näbewürkig.
Am beschte Schribsch mir,
i schribe de scho, weni ma.
E drückti Stimmig, wo d Stimm verschlückt woni probiere ufrächt z erhalte.
Obwohl i ned viel schaffe,
versuechi z Funktioniere,
Es Funkioniert ned so guet,
Grad will i nid guet Schlafe,
ohni Medis sowieso nid,
Bi destwäge am Morge verkateret.
Wünschti es wer anders,
chönnt eifach am Soziale Läbe teilnäh,
Wie gfüehlt jede ander.
Social Media halb so guet, wies mal isch gsi, der Algorythums schisst drii.
Es Wiedersehn z'Unterseen,
Menti bis Friti Therapie,
Es isch aasträngend.
Jede Morge umi vo Huus
u hoffe d'Angst näm nid d'Überhand.
Panikattacke si zrügg, jede tag mehrmals,
D'Medis wärde nüii iigstellt, es wiiters mal,
chunnt immer öppis derzue u derzwüsche.
Ä Bode z'schaffe, es Fundamänt, schwierig.
E witere Versuech, e witeri Näbewürkig,
O guet Kochets geit nid ring i Mage.
Ha nie denkt wie fest e Körper cha achefahre, für eifach z'Überläbe.
Sitze mengisch Stundelang da u cha nume schribe, meh liegt nid drin, kes Wort gseit aber viel gmeint, viel gschribe,
So chani d'Närvosität überspiele,
Will läse isch grad ume halb aktuell.
Uninteressant, wie die meischte Blick Artikle,
gib mir 20 Minute u i Schribe.
Kener News, aber e Botschaft, kener Schlagzille wos nid Wärt si, eifach Tatsach.
Wünschti i chönnt mir eifach es Podcast aalose, stattdesse losi chli Musig, Bibel u natürlich Moralpredigte aa.
Drum Schribeni, i antworte der grad am beschte so.
I sött nu viel, aber es geit nid.
Schribe uf was mi plaget aber du chaschs ja nid läse, wills di überforderet.
Las immer la Riiffe, es paar Stund oder Täg.
Nüd eifach so unüberleit i ds Netz gstellt,
wie e Gfangni Flöige,
gmeint wies Gschribe,
u wies ir Schrift steit.
Viel nid Bös gmeint u glich gmeint wies isch.
Luegs anders aa, wes dir nid passt,
nid persöhnlich gmeint.
Will Persöhnlich hani kes Problem
mit anderne Meinige.
Du malsch nume es Bild vo mir,
wo du nid versteisch, was Bildisch du dir ii, wer i bii u wer du bisch, wed es Bild vo mir wosch de gib mir e Stift u es Blatt Papier,
Male dir eis, nenns Abstrakti Kunst, es dürenand, chasch o d'Texte läse,
de weisch glich viel wie die meischte.
Ha mis Sälbstportait nid us Armuet gmacht wie der Vincent,
Ha kes Ufmerksamkeitsdefizit, nume e
Informationsüberschuss.
Wörter woni versueche z beschriebe wos nid i Duden hei gschafft wienis gärn het welle.
Für mi sis Bousteine, erboue öppis wo mängisch wienes Labyrinth isch für öpper, verfah mi drin ir Komplexität,
dasme mängisch Satz für Satz chönnt läse u drüber studiere, wie bimne Lo & Leduc song, gib mir chli Drums u Bass i ds Ohr nemm mi Troubas wie e Trumpete u das Saxophonsolo vo Patent het mi abgholt, Musig berührt mis Härz u provoziert, wie ii gärn.
Die meischte chönne sich die Ziit nid näh.
Verständnislos wie es Kaffi im Martini,
Trink es Kaffii oder e Cocktail oder las la sii.
Das Schüttlet mi wie die grüeni Olive wos giit derzue, bi mängisch grüehrt vo de Ideene wo si hei, nimme s'mer drus wie d Olive nid z konsumiere, mache nid eine uf James Bond,
O wemes grad chönnt meine.
Kümmere mi 30 Stund um mi u ner nu 20 Stund meh weni Schribe, für mii u für dii.
Mini Bildschirmziit, besteit 10 mal meh us de Notize als Insta, fokusiere mi uf das woni cha.
Bruche nüm nume Stift u Papier,
Das isch nid usem Bode gstampft wie paar Härdöpfel, bi Stock.
Das si Notize wo Jahre druf warte i richtig Kontext grückt z wärde,
Wie gwüssi Bibelvärse.
Nimme d'Inspiration o da drus,
Will i Chraft drus schöpfe, us nid fair wer,
s'la z'stah wos steit,
will im Regal nützt si weni,
bruche se für ds Härz, mi Härzschrittmacher,
Viel hei leider kes Gspüri was Sprüch
schicke aageit,
Mängisch het Gold e anderi Form,
anders als meh dänkt.
U Silber oo, chönnt jitz ume es Sprichwort bringe, aber wed weisch de weisch, wasi meine.
I mache Schluss, s'liegt nid a dir,
es liegt a mir muess zur nächschte Notiz.

-Diego Bircher