I weiss nid öb Gott mii gseht dür die Wolche über mim Chopf, es füehlt sich oft nid so aa.
U süsch isch nu die Schwarzi Wolche da i mim Chopf, weiss nid wieni die loswirde.
Wie es Gwüssegwitter ziehts uf u vergeit.
Es Tropft mir vor d'Ouge wie d'Farb bim Maler.
Sie Male es z'schöns Bild vo mire Situation,
sött der Wanderer überem Näbelmeer sii u der Überblick bhalte, Künstlerisch betrachtet.
Ha ke Wiitsicht, kes Näbelmeer under dä Füess, eher ä Näbelwand vorem Gsicht, kes Liecht in Sicht, es blibt Düster i däre Gschicht.
Vom Tag id Nacht, bi ir Dämmerig gfange zwüsche Liecht u Dunkelheit,
Weiss wie Liecht usgseht,
D'Dunkelheit füehlt sich nid glich aa,
die i mir inn u die um mii um.
Gseh nume umrisse,
wie ir Mondfinsternis.
Es füehlt sich aa als weri ä Speläolog,
oder e Minearbeiter z'Chile,
weiss nid öbi ds töif drin stecke u mir grad mis eigete Grab schuffle, zwüsche Dräck u Gold, Sold u Gott, Schuld u Gnad; Gedanke plagt, öb am End mii Tunnel standhaft isch u öbs es Liecht am End vom Tunnel giit, weiss nid.
Ha obe afah grabe, mit mire Öllampe ir Hand.
Naiv, kenner Schlagwettergschützte Aalage.
Weiss nid wie höch der Methanghalt isch ir Luft, füehlt sich aa als wers meh
als 4 Prozänt, bi Explosionsgfährdet.
D'Uhr tiggt u i weiss nid öbs der Timer isch oder die Tiggendi Ziitbombe.
Ds schlächte chündet sich nid aa, nume weme im Satz ds Wort Hiobsbotschaft erwähnt.
Die meischte Mensche wüsse nid wie töif's cha gah, gloubmer die meischte chratze grad mal ar Oberflächi.
Passt zur aktuelle Gsellschaft, sii Grössewahnsinnig u hei Höheangst, die akuti vermidig vor töifi, macht bi de Gfüehl nid halt,
lieber Oberflächi, Liebi Oberflächlich.
Dert woni bii bringt dir di Bagger nüd,
Bügle im Dräck, e Stoublunge wie mii Grossvater ir Schiefergruebe,
bi fasch am druf gah destwäge.
Blibe hange zwüsche Dräcksbüetz u Tod.
Z'verbrennte Schwarz blibt a mir Chläbe,
wie bim Chemifäger, d'Äsche.
D'Essenz isch verbrännt.
Mache ir letschti Mysteriösi Fünd,
Wie d'Archeologe loufi uf Hochtoure,
ufe Bärg Sinai, sueche nach vergrabne Liichene im Chäller,
D'Gsellschaft chunnt scho de Richter ähnlich.
Mir Richte über guet u schlächt.
Grabe im Dräck,
Zwüsche Gfallene Ängle,
Verschwigene Dämone wärde
Totgloubti Seelene usgrabe u zur Red gstellt.
Mensche interpretiere viel, z'viel.
D'Dunkelheit isch mir vertrout,
Hie une isch d'Warschinlichkeit gross das de Fosilie u Hieroglyphe übere Wäg loufsch.
Viel glück bim entziffere vo däne komische Buechstabe, ir Buechstabesuppe wed ke Ahnig hesch vor Ägyptische Kultur.
Chasch viel i die Parietalkunst interpretiere, s'vertüüfle oder versueche z verstah.
So füehle mii mit mire Depression, sött wüsse wies geit, muess zersch lehre was gmeint isch. Bring mir gschider ds Sprengkommando,
Halte scho der Hörer ir Hand, der Funkspruch chunnt, nime der Sprenghebel,
Spielts e Rolle weni dä jitz drücke,
villich hinderlahts ja es Kunstwärk wie bim William Turner, das wer z'schönschte.
Der Sunneuntergang überem See.
Ds Läbe wird mitem Tod zahlt,
Z'Chärtli abglehnt.
Mis Paypal leer, Bargäld wird nüm akzeptiert.
Ha es paar Milliarde ufem Konto,
kenner Bire oder Öpfel, es sii d'Neurone im Hirn, ha ä Fensterplatz ka ir Erste Klass?
I de Gedanke versunke gsi.
Versuecht mii über Wasser z'bhalte.
Bi une düre, düre dräit u witer im Takt,
troche blibe, Eysturoy-Tunnel.
Im Meer undergange, ds Meer nid müesse spalte. Spalte tüe sich nume d'Meinige wie ii z'handle het, danke für d'Konversation.
Dini Meinig, Bireweich, nid mire Meinig Nach,
mire Meinig nah.
Bi Mir sii d'Weiche gstellt.
Gradlinig, mitem Chopf dür d'Wand,
Giesse chli Öl i ds Füür u luege was passiert.
Eine vo de einzige wo Öl het vergosse us zu öppis het bracht isch der Leonardo gsi.
Ä andere het us Liebi zu mir sis Blut vergosse.
Wett eifach chli ufklärig schaffe.
La mii Ruiie, wed nid weisch vo was d'redsch, paar Meinige sii gschmacklos wie Blasphemie.
14 Jährigi Stärbe a Chräbs, isch das Fair?
I dänkes nid.
Hinderfrage so viel u finde ke Antwort.
Kenner Wort woni chönnt säge weni vor de Eltere würd stah, ke Bibelvärs cha de Schmärz bändige, mengisch isch Schwüge u Bätte die besseri Wahl, bi Chrankheite.
Als gross so z'tue als würds mir öppis a öpperem liege, wes nid so isch.
Mir sii, Chranki Seelene im Garte Eden.

-Diego Bircher