Gib mir es Bild, ii schribe drüber,
Ke Underschrift, die chunnt z'underst,
das wer chli drüber,
mache ja ke Strich, gmäß Ihne.
Nüd im Griff, user der Stift u d'Notize ufem Handy, Griffbereit,
la mini Seel nid im Stich,
Gane dermit gäge Strich,
las nid la Bameble,
Mache nid blau, wie der Robert Lips,
Ke Rosaroti Brülle uf der Nase, wie d'Barbie,
Ke Grüenschnabel, bi ke Papagei,
ke zeichneti Witzfigur vo 1933,
der Wälpeschutz isch verbii, merke mers.
Packe mini Charte offe ufe Tisch,
kes Memoryspiel.
S'isch nid Farbefroh, mal ders us, Mandala.
Eher es Schwarz-Wiss dänke,
Schächbrätt u Gsellschaft ähnlich.
Schribe mit Leib u Seel, d'Seel usem Leib.
Der Griff zum Schribzüüg u Papier,
nu nie so liecht gsi, wie hüt.
Das woni drüber Schribe,
scho lang Schwerfällig,
s'wer scho lang schwer fällig.
Würde nid liechtfertig, bi aktuell liecht, fertig, würde nid liecht fertig mit all dem s'giit mir Lampefieber, obwohls Dunkel isch hie ine,
I mine Gedanke, oft ke platz für Liechtigkeit.
Missverstande bir Medithematik,
Mis Problem, dis Pro isch mis Kontra,
Bisch mir eifach chli z Proaktiv,
Bi dir chli z'Provokativ,
S'giit i der Gsellschaft kes Kontra,
usser es sig nid Produktiv,
Dass chöii mir üs nid leiste, obwohl sich die meischte meh alls sie brüchte chönne leiste.
Üses Leistigsdänke uf d'Medikation übertrage, hinderfrage mi nume was Hilft würklich u was isch nume es Abfädere.
Problemverdrängig, klappt bis zum Klinikufenthalt, gloub mir.
Wed Heilig erwartisch, vo de Medis,
hesch die ganzi Sach nid verstande,
s'isch es Puzzlespiel,
es cha ds passende Teili sii oder o nid,
es Üebigsfäld, es usprobiere öbs passt,
aber verstah wies müesst sii, cha nume Ravensburger, i dem Biispiel.
Ohni z'richtige Teili hesch villich e Egge ab.
U wed e Egge ab hesch, de fälsch,
bisch nid Iisetzbar,
Gsellschaftlich gseh Wärtlos, nid bruchbar.
Wirsch under dim Wärt verchouft,
obwohl 999 Teili würde passe aber eis nid,
eis verderbt ds ganze Bild u dini Form.
Chasch scho es anders Puzzle fürenäh,
Viel Spass, ds Teili passt hinder u vorne nid.
Nume wills bi dir passt heissts nu lang nid dases bi mir o passt,
öbs dir passt oder nid,
isch er Versicherig egal.
Houptsach sie zahle nid,
u d'Zahle stimme Quartalswiis.
Ä Chrankheit isch kes Wunschkonzärt.
ä Triage, äbe kes Wunschkonzärt,
wie im Örgelitrio, Kes Quartett, Kes Konzärt, nume Vier Charte wo zunenand müesse passe.
Vier Elemänt u das isch d'Quintessänz,
"Rede mängisch Gold wärt u Schwüge oo",
Säg eifach du versteisches nid,
das wer zminscht Ehrlich.
Bi offe fürne Dialog, aber verschlosse gägenüber monotone Monologe,
Wo mir wei erkläre dass sie d'lösig hei für miner Problem.
Dini Wahrheit isch nid mini u welli de er wahrhaftige Wahrheit entspricht chöii mir beidi nid säge, also lö mirs besser.
I rede gägne Wand,
füehle mii wie im Biichtstuehl,
überchumme scho es Gwüsse,
bim drüber Schribe.
Bisch Nachträglich,
wie e Prediger bi Falsche Botschafte,
oder wie gwüssi Lüüt wo mir es schlächts Gwüsse wei iirede.
Schwierig sich usztusche, we jede bi allem am liebschte Ja u Amen seit.
Mir sötte mängisch besser zuelose,
we eine scho seit wies Ihm geit,
will guet geits nid immer, o wenners seit.
"Es geit mir guet" isch eifach ä Gsellschafltich anerchennti Lüüg wo me gloubt,
Lüüt mit Psychischi Problem gloubt me nid, das chame ir Chilche oo, i weiss, du chasch sache nid usenand ha, z'handle vo Chrischte hett oft nüd dermit z'tüe wie Gott isch
u so ischs oo bi Psychische Problem,
mir göh id Psychotherapie,
U du dänksch när a nä Psycho i Therapie,
de würds dir höchschtwarschinlich sälber guet tue di la z'Therapiere,
mini ehrlichi Meinig.
Hesch es Iigschränkts dänke, fasch wie ii es iigschränkts Handle, mit mim Handglänk.
Ha es Halbtax u zahle glich der voll Priis für mini Psyche, mis Punktechärtli angens usgfüllt bi 10 Jahr giits eis Jahr Gratis, hani kört.
Öb vererbt, oder verderbt ir Schuelziit,
Ds Läbe nid fair, derfür viel glehrt,
Gib mir chli Vorloufziit de wirsch gseh,
im Zweite aalouf hoffi es klappt.
I kenne mis Abloufdatum nid aber weiss es chunnt, drum schribi wie Wild druf los.
schribe us freie Stück, bi nid aagstellt,
Sie säge es sig 0 Positiv,
aber kenne mini Bluetgruppe nid,
Bi nid Geisteschrank, vo Dämone besässe,
kenner Geister wo me cha ustriebe,
we meh mir der Geist würd ustribe,
weri Tod, das wer Blöd.
De chönnti nüm Ufschribe was mi bewegt.
Wott es Zügniss sii, ke Legände.
Bi nid so der Typ für under Füf Ringe,
z' Chrampfe, für Eii usgfüllte Ring z'erkämpfe,
wo mi nid usfüllt.
Ha oo Gold gholt, im Ringe, Ke Schwinge, ke Negativi Schwingig, chli Lethargie gibi zue,
Bi 'm Mijaín López ähnlich, eifach veriinerlicht,
Ha nüd dervoo treit user paar Wunde oder nenne mir se Kerbe, die si ja nid usse Sichtbar,
u natürlich der Ring us Edelmetall ii mire Hand, s'het alls sii Grund,
bim einte ischs der Hallebode, Sagmähl, Ruhm u Ehr, bi mir d'Hutt, der Stift, öppis für d'Seel.
Es geit under, wie der Beton, der Rase, under d'Hutt, d'Tinte, Nume Stoub u Dräck,
wie ds Härz we alls drumum vergeit,
D'Einsamkeit chlopfet o bi de lüütischte im Ruum aa,
Spöiie kener Höche Tön wie im Sydney Opera House, di Name so wichtig im zämehang u glich hesch ke Stimm, da inn,
Peter Brian Hall Style, zrügg zu de Zeichner.
Sini Stimm scho lang verhallt i dem Gebäude.
Ha ke Legändestatus, isch nid schlimm.
Legändene ziere ufer Charte e nume une der Eggä, es spielt ke Rolle weme der Orientierigssinn nu het.
Bruche nach dem Text chli Facelift für miner Stressfalte, oder es Bad im See,
wer o guet wie der Noah, nacher Sintfluet,
Es flügt mir angens um d'ohre,
wie es Pegasus Airline Flugzüg.
S'giits villich nume einisch im Läbe,
e zwöiti Chance.
Bi Chrützgrichtet,
boue ufem Chrüz uf wie d Wirbelsüüle.
Ha e Grade Rügge aber hinderum loufe paar Dinger Chrum, im Hindergrund verstecksch di.
Füehle der Schnuff vo dir im Nacke, Vorcoronaziit, obwohl du mi nid chasch Schmöcke. Es Chopfgäld usgsetzt, dass Sie cha mache was Ihre passt, das passt mir nid.
Ke Verfolgigswahn die wo wüsse,
wüsse was gmeint isch.
Ha di im Blick-Winkel,
dii Blick richtet sich a mii,
ds Blicklogo obe Links, verschwumme,
ke Neutrali Sicht, ha Linse drin,
nime dii Wahr, wie es paar Blickschlagziile.
Us mir Siichtwiis unnötigs gschwätz, wie
die Ziit wo du ufwendisch, für mii z'läse,
Hesch mi mit kem Blick gwürdiget,
i cha dir wenigstens id Ouge luege,
U dir Ufrichtig under d'Ouge trätte.

-Diego Bircher