Es paar Bier verendere mengs.
"Christ oder Süüfer?" fragt me mi öppe we si köre vo wo dasi här chumme.
Predige Wasser & trinke nu meh Bier.
Mir rede siit Jahre über z gliche,
wie im "Hahnemoos Pulverschnee, Piste gut", Schnee vo gester.
Je nach Ton ischs e Song oder es Material?
Versueche ne ned ds verliere der Fade
u der Glube, a d Menschhiit.
Aber glubmer mengisch zwifleni dranne,
dass das wo mir Ufbuue würkli das isch wo söll sii.
Im World, Wide, Web finsch viel Theorie wie d Wält de wer entstande, öb dür Schöpfershand, oder e Knall,
Uf all Fäll spalte sich d Meinige u d Gmeinde.
"E Knall hei uf jede Fall vo usse gseh, aller"
zu rächt?
Aber d Theorie vo anderne "alls besser denn Ye", sägesi zminscht.
Z Stolz zum merke wie widersprüchlich o sii sich mengisch verföh im gedankegflächt vo Wahr, bewiese u Ächt.
"i denke z guete gwinnt de scho", Ja das hoffeni oo...
Aber was we ds guete sich nume guet aafüehlt user Sichtwiis vo mir?
u de näbe mir, dernäbe wieni finde,
wo es anders Liecht ufne schint, s anders empfindet?
Sich so e Frust ufbuut u e Konflikt bildet,
"Z viel falsch gmacht u zwenig Reflektiert" "würke tuet nu viel i Gotts Name",
Hinderfrage, tüe mir nes gfüehlt nie.
Schiebe wie bim Schach e Figur u somit der Pass witer, wills ringer giit z frage.
"We Gott, wie cha de nume so viel Liid uf däre Wält...?"
"Gott für gält's,
-machesi alls"
Aber was wosch de, der Wältfriede oder der Frii Wille, am beschte beides.
Entschiede uf däre Wält tüe mir, Oder?
-doch ä Gott?
"Öb er würkli i jede Egge vor Wält würd Waffe liefere?"
Oder obs vo Ihm Gwollt, so viel abtriebige?
Was we der Lehrmeister em Lehrling i Uftrag giit was er söll Forme us dem Ton.
Der Lehrling us dem Ton, ned formt was vo ihm erwartet sondern sini Verantwortig Missbrucht, will er d Macht wo ihm gäh beasprucht, öppis z kreiere wo sim Wille entspricht u so vergisst, wär ihm het ziigt wie u um was es giit?
Glich i ihm d Hoffnig schlummeret das der Meister begrifft,
Er besser higi gwüsst us wellem Ton er was macht oder Gmacht sig.
Der Lehrmeister sichtlich ned begisteret ihm siit "mal ehrlig"
-der Ton entscheidet,
-u doch o ned was us eim Gmacht würd, will er ifach brucht würd, u ned entscheidet ob er Missbrucht würd.
Guet ds Wüsse, schlächt usgfüehrt, giit schlächts Gwüsse.
Nume will mir Ressource zur verfüegig gstellt überchömme, hissts nu lang ned das mir chönne mache u tue wie mir üs das vorstelle, We jede macht was er wott,
de wärde es paar Machtwort gsproche.
so entscheidet ds los drüber wer Macht u wer Machtlos wird.
Es isch wichtig dasme sig mengisch los löst u glich ned vergisst sobald me z Los löst,
verenderet sig e ganzi Definition, Wortwiis.
We Macht missbrucht würd, wird us der Wält gmacht, was jitz isch
u das isch zminscht us mine Uuge sicher ned d Lösig.
Egal ob A-, Th-, Islam- oder buddhist.
Gschafft hets wahrhaftig nu kine,
z bewise was Sinn u Unsinn.
Mir hi zwar viel Forme, wo sache chönnte dri passe,
Es Huus: aber Stärne, Mönd u Chrütz chame nume als Chind i ei Topf schmeisse u o da nume dür die passende Öffnige.
Was söll üs das lehre, o wemer viel Theorie u Praxis hi entwicklet, chame praktisch säge simer glich ned wiit, i üsem denke
aber ir entwicklig,
d frag da isch, was würkli wichtig?
-frage mir üs aller plaget, egal wie wit entwicklet, giits öppis wo höcher als mir,
u das Läbe hie,
vergenglig wies isch, i sich Sinn ergiit?
Gott sei Dank hani mi entschiede, mä ä träff z gäh u druf z vertrue das die Figur wo i wähle
z lescht das isch wo blibt bestah,
aber wer bi i scho für dir für z ha, für was du söllsch gah?
I cha nume us mim Läbe, erläbe u Glube brichte u wott lehre z Richte dem z Überlaa wo i z gfüehl ha z wüsse, wer er isch,
Ihne wo würkli cha Sinn u Unsinn, Rächt u Uurächt usenand ha, gwagt ischs ganz klar uf öppis z setze.
Bim Roulette chaschs oo, Schwarz oder Rot oder gar Rot oder Blau, Filmriss, Matrix.
Villich isch das, ds falsche Fäld oder die Falschi Pille, aber de hani mi wenigstens entschiede, für öppis z gah wo i mim Sinn, Sinn macht.

Tuusigs totze oder Musigs töpfer, Sinnlos
Fakt isch jede vo üs muess gah, -vo hie iz Jenseits wo Guet u Bös hoffentlig ki Rolle me spiele...
Endlich,
...wie ig i däne villich bedütigslose Zille.

-Diego Bircher