Es schmeckt nach Talisker oder nach em Lädergmack i Tätels Wärchstatt, gschmacklich ähnlich, Gschmacksach,
Griift vom Holz umgäh.
Je nach däm dür wells Glas me grad gugget,
z inte Rund mit Iischwürfle am bode u ds andere Egig beschlage vom Schwüele wätter.
Rieme hesch hie zwäggmacht, wo d Trechli hi gschmückt, ds Flober hinder er Tür am vor sig hii hange, nie brucht siit Jahre.
Was e Maa isch u wie me e Ehe uf d Bii bringt u bhet hani glehrt, über dis sii als Vater.
Der oberscht Gedanke dases er Familie guet darf ga, Gott ned us de Uuge glah.
Ha nie zwiflet dran das d öppis ned chönntisch, uf d Mensche um dii iigange, ha di Vater nie kenneglehrt aber wieni kört ha, tönts so als würdisch nes öppis vo Ihm witergäh.
Z Houpt vor Familie, aber ned Rücksichtslos u Sälbstverliebt, sondern Nächschteliebi, gseh wie du dini Frou hesch geehrt u gliebt.
Gradlinig aber Respäktvoll, e schmale Grat aber du heschs gwagt, bisch ne Gwanderet u hesch es Gmischteret, Balance bhabe.
"Schlah" es wort wo mir nume vom Köre säge hi kennt, wed de einisch bestimmt hesch gsiit wie ds gärn hettisch u mer söll ufhöre, hi mir scho gwüsst das d Grenze gsetzt isch.
Hochachtigsvoll, es riese Vorbild wo mi prägt, ä Vaterfigur, Es wer es Portrait Wärt, für annehernd ds beschribe was d hesch gmacht, für mi, für üs für di um dii um.
Fehler gmacht hesch, ja wär ned?
Aber im Gägesatz zu däm wo du üs ufe Wäg hesch gäh, fallt das ned entscheidend i ds Gwicht.
"Dir ned ds Schad", d fürsorg wahrgno,
für üs da, jederziit.
Ki druck bir Lehrstellesuechi, will me ned het z gfüehl ka mi müessi dirs glich mache u Zimmermaa wärde.
Ned ds Gfüehl erweckt "öpper sötti de der Hof übernäh", danke.
Du hesch üs der Wäg gäbnet, uf z läbe u siner tücke, hesch di Reflektiert, üs vorbereitet, das mir üs hii aagfange sälber hinderfrage u o Reflektiere.
Der Gluube witergäh u o respektiert we mir em Gluube neme so si nachigiiferet wie o scho, üs la mache u frei entscheide.
Ned Tuuft sondern Iigsägnet, dases i üsem Wille isch ds Entschiede was mir wi u was ned.
Weme iis het Rat brucht hani dir ging dörfe aalüte, sigs nu so banal gsi, ä guete Rat oder e antwort hesch nu ging druf ka, ä Säge.
Nehme der Jüngst, e gstandne Maa u glich ned ds Schad miter chline Schwester z spiele.
Was e Vater usmacht, das er da isch u was z tüüpfli ufem i, wenner Autoritär, sig das bewusst isch, us glich ned usnützt.
Das i grad ned ds höchschte höii vo mim Läbe ha, chasch du nüd derfür, wie ds Muetti o ned. Das isch halt villich vo irgendöpperem vererbt, aber das isch okei.
Sälbst we öpper öppis derfür chönnti, es wers mir der Wärt das düri z chätsche u o ig müessti ufpasse s ned a miner zuekünftige Nachkomme witer z gäh.
Mi cha ja lehrä am beschte vo däne Ziite wos ned ifach, wo me öppis muess ufgäh derfür.
Es het di hert ka das mir si uszoge,
I ha dini Hilf brucht, woni gsiit ha mir welle ir Eggewiid hürate.
Ja nu niemer het dert obe z gfüehl ka er müessi es Podest ufstelle, für vor 90 Lüüt bi unbestendigem Wätter, z Ja-Wort z'gäh.
Du hesch ifach gholfe u understützt so viel gmacht für dass das der nahe zu, perfekt Tag het dörfe sii.
Dini sterchi ifach di zrügg z ha u wed nacher Minig gfragt ehrlich chasch Antwort gäh, das schetzeni a dir.
Das Whiskeyglas neigt sig em End u so o d Hommage a dii, i liebe dii Tätel für mi bisch der bescht, ufer Wält gsi u blibsches nu ging.
Es höii uf d Höii u uf allz andere oo, i liebes mit dir am gliche Tisch z hocke u es Glas Wii ds trinke, mit dir öppis z mache u der dermit z zeige das so viel entschiedige vo dir si Richtig gsi.
I ha ned nume vo anderne Lüüt kört, das d Zueverlässig u der ned ds Schad bisch, i has dörfe erläbe vo de erschte Läbesjahr bis hüt, du bisch der bescht.
Hesch mini Frou vo aafang aa eifach ufgnoh, mir vertruut dasi öpper ar Siite ha, wo passt.
Zille für zille vor mi hii gschribe us luuter Dankbarkiit a dii, bis gsägnet u bhäb bestendig der Gluube a Gott i de Uuge.
Gugg uf z Muetti u mini Schwoscht häb ne Acht u mach, wieds bi üs hesch gmacht, füre Räscht würd Är Sorge u diner Sorge chasch gsorget em Höchschte überlah, di Vater im Himmel wo genau wie o du mi Vater isch,
zu glich.
Danke für dini Ziit, i wotts der säge bevor is berüie, s ned ha gmacht ka.
Es ehrt mi di mi Vatter dörfe z nenne u di Sohn z si, uf Ewig Dankbar, di Sohn.

-Diego Bircher