Üses Rendez-vous, hüt.
Es guets Glas Wii, Bluetorangerot,
Chli Fleisch, Randejus, für d'farb.
U für miner Abwehrchräft z'sterkä,
Dir chönne z Trotze, nimmes Vorgängig, mache öppis gäg mii Bluethochdruck,
wo du verursachsch.
Schenke Tomatesaft i ds Glas, z'Apero,
S'giit e Bloody Mary,
wie bi Hochziite innerhalb vor Familie.
Schmöckes mit chli Wodka u re Mässerspitze Salz u Pfäffer ab,
Tabasco, Mässer- Scharf, füre Mage i Schwung z bringe, es würd Bluetig, eine vo üs cha de Ruum nüm verlah wiener isch inecho, du oder ii, wärfe mir die Chugle id Schale,
Schwarz oder Rot, Läbe oder Tot.
D'Lampe glüeht churz uf, der Tisch isch belüchtet, es chlopfet.
Weiss was uf mii wartet.
Das wird mis Kryptonit, mii Läbeslouf.
Willkomme i mire Seel, nime mis Chrüz uf mii,
Das wird d'Höll, ds füür verschlingt die guete Gfüehl, d'Glogge lüte, nid die vor Chilche.
Es isch sowit, es würd Dunkel.
Setz di a Tisch, jitz chunnt mis Gricht.
Heschs usegforderet, bisch der Aaklagt u ii der Kronzüge, s'gseht nid guet us für dii.
Ha dii us mine Gedanke glöscht u verdrängt, bis voletscht, wod mir bisch begägnet, uf mim Wäg, i mine Gedanke.
Vorer Tür gstande u ine welle, d'tür zur richtige Seel verfehlt, mis Traumata.
Steisch vor mir, i denke mir hei öppis z berede, wott di verchlage.
Du fallsch mir ii Rügge, geisch mir uf d' Närve, Bandschibevorfall i mim Alter, wäg dir, der Druck erdrückt mii innerlich,
Früecher kes Rückgrat zeigt.
Jitze wirds entschiede, dis Läbe het g'endet vor 11 Jahr, verworfe hani dii bis hüt.
Hesch ke Läbenserfahrig, bisch zweni Wärt gsii, nid mal gnue für diner Fründe z bhalte.
Ds Läbe nid wärt heschs sogar dire Muetter gseit, so viel Schmärz wo die Momente prägt.
Bisch iiknickt, hesch dii la vergrabe u hesch z gfüehl du chönnsch jitz uferstah, mir sii nid ds Golgatha, dass hie isch David gäge Goliath, u du hesch die schlechtere Charte.
Hettsch zwar gnue Steine uf dem Steiihuufe uf dir druffe, wo sii di gsteiniget hei.
All die Mensche wo der Finger i d'Wunde gsteckt, dii hei verletzt u versetzt hei.
Die hei ihre Wäg gmacht u du bisch nu immer am vor dii hii tribe,
Wed dii ersticke, im Meer versenke uf Ewig.
Ha dii achedrückt, di welle Töte, der d'Luft entzieh, Bisch wie es Fossil,
wo sich im Stei het verewiget.
Cha di nüm Uslösche user i würd dii zerbräche, bi nach dranne das z mache.
Gseh scho d'Initiale ufem Grabsteii iigritzt,
Das isch falsch du söllsch dert drii, nid ii.
Vo 2000- die anderi Jahreszahl fählt no,
ke Ahnig wenns wird sii.
Es wer als wersch du ii uu ii du.
Wott dis Liecht lösche,
Muess nume nu der Stecker zieh,
Bis so nach dranne gsii wie nu nie,
endlich Freiheit, endlich Rueh.
Wott nem Läbe so u o nid Stärbe so.
Du bisch wie mis Gift u ii ds Gägemittel, mir hasse üs u glich simer üs so vertrout.
Dis Bluet isch o miis, wünschti es wer anders.
Weiss nid wie du das alls hesch überläbt, wünschti i chönnti der glich Läbensdrang verspüre, wie du.
Der Wäg füehrt unweigerlich i ds Schwarze,
Us Schlächte Same, chönne kener guete Frücht entstah.
O gueti Mensche sii Meister drin schlächti entscheidige z'träffe.
Der Tüüfel uf beidne Schultere, chum mir verbrenne alls wo isch gsii, ke Hoffnig i Sicht, ha gseit es wird dunkel.
Füehle mi wie der Gfallnig Engel vo dir,
Ds Schlächte Vorbild, ds Nächär.
Zeichnet vom Läbe, vernarbt,
Die Klinge isch so Spitzig, spitzgrichtet ir Brust, versueche se z'entferne, ohni Verlust, ke Kardiolog, ke Härzfehler, ke Kontrolle meh.
Sueche Gott, wo bisch jitz? Wo bisch we mi ds Böse verfrisst, i verätze vor Schmärz, mis Härz verseit im Sekundetakt,
Es Füehlt sich aa als würd mini Huut risse übercho.
Bi us Stei, i verbriche, bi kaputt, zerstört am Bode une, versprängt.
Spiele Rock, Paper, Scissor u verliere,
Bitter we me nume z'Spiegelbild vor sich het
Bi verlore im Dunkle.
D'Depression mi Tanzpartner, si macht Piruette u verdräiht mini Wält, bisi nüm nache chume, wed d'Ziit gärn zrüggdräihe, aber de würd alls usem Glichgwicht grate, ha Angst.
Gueti Wärte, e Wehmuetstropfe uf mire Seel,
Gsellschaftlich gseh unrelevant.
Sii üs so nach u glich so fern,
Üs verbindet z'viel für getrennti wäge z'gah.
Aber irgendwie müesse mir das kläre,
Cha nid Stärbe u du nid Läbe u umgekehrt.
I gibe mi nid so schnäll gschlage,
D'Leistig steit über allem für mii,
bruchsch d'Spannig für z wüsse wie viel Strom dir entgägechunnt,
Chunnt dir das bekannt vor, us dire Lehr wo de nume hesch verseit.
S'würd mir z Mathematisch, ds Formelbuech versteckt ire Schublade wie ii bi vielne Lüüt.
Schwimme gäge Strom u versueche ds Vergäh, ha mi lang gnue verloge.
Dis Plädoyer isch guet gmeint,
aber schlächt umgsetzt.
Dis Urteil: Death Row u so oo mis.
Irgendwenn holt üs der Folterknächt u vollzieht sis Urteil u bis dert müesse mir läbe.
Es hanget am Siidene Fade.
Wende mii es leschts mal a Gott für mii iizstah,
"Gib mir Chraft, das isch mini leschti Chance".
Der Altar isch bout, bi wie der Abraham u du der Isaak, mir schrite langsam richtig Altar vor, lege dii druf, ii zieh z'Mässer uf.
"Herr, vergib mir, will i weiss nid wasi tue.."
Wie schön sii die leschte Atemzüg,
hie uf mim Bett us Holzäst, u schlafe ii.
Köre es Liebs "Schätzi, Guet Nacht" z'lescht.
De Begriff isch mir vertrouter als mi Name, es seit mir meh, weiss gar nüm was fürne Mensch de Diego isch gsii.
Ha di Metaphorisch tötet, vor 11 Jahr, bisch gstorbe gsi für mii, muess mi wohl oder übel numal miter abgäh, bischs Wärt i weisses nid.
Gibe der nu Eii Chance, bis der Tod üs scheidet, mini Liasion mitem Spiegelbild.
Versueche mir z Vergäh woni ha verseit,
s'isch ä länge Wäg woni muess abwäge öb's dass Läbe würkli Wärt isch, viele Dank für dä.

-Diego Bircher