Der Morge grauet mir wie z'Läbe,
Chli wie ds Solothurn, no nii Mii Tag.
Schlafe guet & z'Läbe tuet, obwohls oft Ach und Krach verursacht, wie Gorillaz im Nulleiis.
Das hie isch so Iifallslos wie Benissimo,
Die Zille sii sogar em Damon z'Albern,
Gseh ds Läbe dürne Schibe, wie de Wallen.
Schöni Liechter, aber wiit wägg vo Romantik.
Es schlaht Wälle, es schlaht schwär ufe Mage. Ds Läbe ä Körperhake vom Connor McGregor.
Verkehrti Wälte wie Soldate im Film,
Operation Red Sea.
Bini z'Ufmüpfig wie Struuchgstrüpp oder
Ischs es kämpfe gäge Gwittergwalte,
Räge u Härzschmärz, es warte bisis sich leit? Bruche Chraft, Liebi u ä Starche Rügge.
Bewege mii zwüsche Grüene Ample u Rote Flagge, Chrankheitsbilder u Gsundheitsfrage,
Zwüsche Gsetz, gsetzte Sägel,
Säble wo gäg mii zeige.
Verletzige hei sich ii- u Usprägt.
Läbe imne Lade wo mir der Saft entzieht wie Usschankgrät vo Grapos.
Es paari meine es sig nume mii Chopf z'Problem, ar Kreativität liegts nid, das isch doch nume ä Virtuell oder Geistliche Kampf, nid Griifbar wie mini Läbenslehr woni druszoge ha.
Mängisch wachst me am beste, weme eifach im Kreis sitzt mit all dem wo eim verletzt u füehlt, bis all das aafaht d'Chraft verliere.
Häb doch am Gloube Fest,
Du hesch gloub ke Ahnig vo was für Gloube du Redsch.
Das woni mir ha müesse aalose über Jahre, ha glitte u Gott hets lah gscheh, nimmes aa aber nid das du mir seisch wie ii mii z'verändere ha, die Narbe sitzt z'töif derfür.
Sit Mensche Liebe, sii Mensche Hässig,
Sit Mensche hürate, sii Mensche gschiede,
Sit Mensche chömme, sii Mensche gange,
Sit Mensche Gedenkä, sii Mensche gstorbe.
O Vögel flüge ii verschiedeni Richtige, was richtig, haltet ne niemer vor.
Gseh chli z'viel Ungreimtheite i däne Gschichte, Interpret Meister wie Shazam.
Irgendwenn isch Schicht im Schacht,
Es isch wie Zieh, Pflicht im Schach.
Chlopfe a d'Himmelstüre,
wie der Bob Dylan früecher.
Chlopfe draa wiene Chriegsveteran nach all sim Tatedrang u Frage nach Vergäbig ir Hoffnig dases villich ja nu ä Platz Frei het i dem Paradies.
Füehle mii zwar zur Ziit eher wiene Parasit, gfange ir Melancholie vom sii.
Bi so usgriift wie mii Bartwuchs, es isch öppis da aber sött nu chli derzue cho, für guet.
Stosse Problem nümm vor mii hii, gah se aa,
Sie wei Veränderig, Tadaah.
Leider nid so Romantisch wie du u ii mir das vorgstellt ha.
Zwölf Jahr u d'Therapiesitzig isch nu nid abgschlosse, bi aber dranne wie immer.
Ja, mit Gottes Hilf wie zu Hoch Ziite.
Lieber ii la Mensche gah ir Dankbarkeit u versöhnt mit mir als Sii usznütze bis sii mii hasse.
We öpper seit er sig "Müed vom Läbe",
Spitz ii Ohre wie Lüchs.
Wett nid uf die Holztruehe luege u merke dass er das gmeint het dermit.
Es sii z'viel gange, es sii z'viel gsii,
z'weni hei gredt, z'weni heis cheggt.
Ha Depression, es Pinselohr u Adlerouge, Sehschwechi isch öppis für Hellseher,
hani gmeint.
Ha ke Rosaroti Brülle ufer Nase, gseh z'klar. Das Läbe vielne z'Heavy, wie Metal.
Wott nid das de Schmärz für nüd isch,
drum Schrib ii.
Wott nume ufzeige das Heilig existiert,
drum Red ii.
Drum liesi mii ii, drum liese se us,
Schribe se uf u liese se ab.
Bi ke Internet Explorer, nume ufer Suechi nach Wahrhaft, wie Pilgergänger im Einezwänzgischte Jahrhundert.
Sie risse Sache usem Kontext wie Adventskalendertürli, gsesch nid ds Grosse ganze, s'ischs nid nume em Gross z'Verdanke, die Title vo Lugano u em FC Basel.
Bii ke Suechmaschine, würfe glich mit Begriffe um mii ume wo vieli ä Erklährig bruche.
Wett nume zeige, Therapie cha verändere,
Ha die töifschte töifs erläbt, vom ii muess nume losfahre der Strick packt bishin zu ii cha Sache aapacke, aaspräche, Wäge gah, Entscheidige träffe wo so ungmüetlich sii u mir z'Härz verisse, derfür füehli Läbe u Liebi wieder, alls het sii Priis so o d'Therapie.
Perfektionismuss versücht die Gsellschaft,
Wie gwüssi Gsetzlichkeite ii Chrischtliche Kreise.
Sie säge ii sig Grobfahrlässig,
Wie der Hamilton bimne Sunntigsusfährtli.
Lieber füehli Läbe, als Tod unglücklich.
Gwüssi Sache versteisch nid, okei.
Gwüssi Lüüt Schutte nüm u sii glich öppis gsi.
Gwüssi spiele sii nu immer, obwohl sii Alte Schule sii.
Alls isch vergänglich aber nume will öppis z'Abloufdatum erreicht het, ischs nid Automatisch schlächt.
Es brucht immer mehreri am Änd, aber gwüssi Sache sii Ändgültig wie z' Zu verkaufen bis:
Versprich mir eifach das mir nu eis vergisch, wenis vergäh ha.
Es wird Liecht wärde, dür dini Wort,
wie bir erschaffig vor Ärde.

-Diego Bircher