Knarzends Parkett, d'Türe verschlisst mini Liebi, wo ischs häre das Gfüehl im Buuch,
Das Gfüehl vom Buech, das Gfüehl im Stuehl, Das Gfüehl im verruef,
Der Gruch vor Liebi hallt nache.
Zieh dür d'Strasse ir Nacht, wie ä Vampir ufer suechi nach Läbigem Bluetrot.
Ds Bluet isch nem gflosse u d'Liebi verkeit.
Bi nume nu es Plagiat vo mir sälber,
Has fasch gschafft dii z ersticke,
Es alts Modäll, usghöhlt, Uströchnet, Läblos.
Mis Holz ir Hand zeigt aa,
ii sig nid passend i där Gsellschaft,
Schinnt als hetti z'viel Kerbe.
Ds Huus uf Stei, Huus mit Gsteii, Huus us Steii,
Wie Kapitaliste oder Houptstedter, Hochstabler wie Höchbouarchitekte.
Tüschii mii, entüschi dii, verzeickti Situation.
Sueche Charaktere, Joker, irgend ä Clown.
Wähle der Pennywise, wie bim Brexit.
Bi der Depressiv Dimitri, ohni Clownnase.
Z einzige wo mii zrüggversetzt sii Scratches, Es chratzet zwüsch de Gedanke wie Schuppe.
Sitze ufer Schulbank vom Läbe aber wirde immer leerer, der Chopf voller,
d'Gedanke mini Chrankheit.
Sie chlopfe aa, empföh mii mit offene Arme.
Mini Gedanke wie Eine gäge Hundert,
viel fuule use wie bi Obstbuure.
Sand im Getriebe, i de Ouge chratzets, wiene Sandstrahler treits ds Material ab, wie Düne türmt sich de Sand wo verlouft i mine Händ. Sueche ds Sandchorn vor Liebi ir Sahara u hoffe der Erst Griff passt, sinke zwüsche Liebe, Verliebt sii, Gfüehlosigkeit langsam der Triibsand steit zur Stirn, akzeptiere das Leid.
Sitze die Klosse immer im Hals?
Wiege die Frage i Schlaf,
Wünscht mir ä Antwort,
Chli Liebi zrügg, Ä Umarmig,
Ä Umfahrig vo dine Kurve mit mine Händ,
Träne über die Küss, ä beidne tuets weh.
Liide die Laste, Drücke die Träne,
Spöiie die Flüech, Spräche die Gfüehl,
Bräche die Härze, die Brot u der Liib,
Wasser zu Träne, wünschti es gieb ä
guete Wehmuetstropfe, wie Jesus.
Abbisseni Öpfle Adam, Apple & Eva,
Nicke die Beats, kreiere die Gschicht,
Schribe die Texte, Texte die Krise,
Brustdruck, Härzkreislouf, Gfüehlsstrudel.
Riss mii mit, Schreck mii uf, Triib mii dervoo,
Bitzi Liebi, Bitti, Bätti, Bitte, Bätte, Töte, Läbe,
Strich mir de Fade vo där Süessi um ds Muul.
Bi ki Liebestourist, i wott nid nach paar Täg oder Wuche gah, das chani nid.
I mim Chopf isch nid gnue Platz für Depression, Liebi, Mut, Gott, Angst & Emotion.
Lieblos, Dornerosig mini Zuekunft,
Flüech zum verdecke was nid verheilt het.
Der Küder verbrenne, ir Hoffnig Erinnerige chönn me lösche.
Wett blibe stah die Gschichte verstah, die Liebi Läbe, die Ziel Sträbe, die Säge säge, die Flüech verflueche, die Dunkle Liechte, Die Laste liechte, die Chrumme Grade, die Grad verendere, der Fokus richte user Iiszyt iz Ewig.
Ds Huus uf Sand, der Meersspiegel zieht sich zrügg, für sich über dir ufztürme, d'Tsunamiwahrnig bringt nüm, jitz stöh mir da vor däre Wälle voll Liide u ii Schribe,
Erliege däne Zille.
Männer Hüle nid, bis Sie ä Hülle sii,
Si nähme die Schüss uf, als were Sie die Schlüssellöcher wo müesse warte ufä richtig Schlüssel, ha ghört das Männer sich ufopfere für d'Liebi, jitz bini a däm Punkt u gseh wie viel das Laster wiegt.
Ä Tortur für mis Immunsystem
I schreie ine Luftleereruum u ghöre z'Echo vo dä Seelene wo im Himmel warte, der Tinnitus singt mir es Lied i ds Ohr, drum Schribi, wäge dir, du wo all däm bisch zerbroche, für däne Liecht z'bringe wo vor Dunkelheit verharre.
Das Fägefüür wartet druf usglöscht z'wärde, Nimm die Löschdechi u zerstör die Höll.
Mis Härz verbrennt, was übrig blibt, hoffe das wo isch blibbe vo däm Chrieg, a Liebi,
a Friede, ufbouti Resilienz.
Wo isch mii Glücksbringer wo sich versteckt hinder Ägyptische Zille,
Der Kranich stöndi für Glück, meine sii,
Der Kranich woni gseh steit Eiibeinig im Seich.
Die einzige Vögel woni gseh, sii d'Bäch Vögel weni er Kander nah loufe.
Rege mii scho Tierisch uf über mis Churzziitgedächtniss als hetti es Spatzehirn.
Die einzige Löcher wo mir id Wolke mache ufem Wäg gäg ueche, verstecke sich im Zigaretterouch we üs d'Puste usgeit.
Die Texte, mis Ave Maria, mini Derniere.
Sprich die Dunkelheit wägg,
Sie drückt, umhüllt dii u verschlingt dini Seel.
Bi vo paarne scho Totgloubt gsii,
aber Läbe nu, wäg däm.
Danke dir nu mal für alls das chunnt vo Härze.
Chumm mir löh es Liecht la Schine für die wo sii blibbe, dir siit üs Wichtig.
Mini Texte ke Glanztat, wiene Friese, i weisses,
bi mir loufts nid Glatt, wie bim Kahlschnitt.
I lah dir paar Bletter übrig, zum verchoufe bevor ii gah, versproche.
De blibt öppis übrig, Chli Gschribes, Stärnestoub, chli Poesie, Riime, chli Liechter wo sölle schine, chli Liebi wo söll bestand ha, Chli Träne wo vergosse, chli Büecher wo sii Schribe, chli Mittleid wo sie bringe.
Chli Fliiderduft, Wiirouch u verbrönnts Holz.
Es stück Glücklich bis i ds Ewig.
Bis Bald wie ä Englischi Glatze.

-Diego Bircher