Schönheit, Zieh die Winston usem Wiis blaue Päckli, der Himmel tränet.
La das Riibrad la düredräihe,
halte ds Rote Pedal une, las la brenne,
wie Formel Eiis Bremse.
Es giit Sache die sii nume Formell.
Schwarzi Nacht, Wisse Rouch, Pandafäll,
Rägeperle tropfe vom Dach.
Ds Füür flügt verchert zum Wasserfluss gäg ueche, Vulkanusbruch während ds Wasser vor Schwerchraft triibe über d'Dächer zieht,
im Fluss als Fluid, inhalliere dä Rouch vom Magma erzündet dür de Filter.
Halte inne, Tigge us, zieh de Zug,
Dänke a Motiv woni nid verstah.
Näbel het ä Vibe, Näbel White,
Manillio, Portofino ii de Airpods,
Bunte Hund, miesi Friese Dennis Rodman.
Jung u Hässig, gib mir chli Ziit für ufzblüeihe.
Wosch d'Sekunde zelle, machs wie ir Schuel.
Mini Lieblingszahl Zwöiezwänzg,
AC Milan Mittelfäldspieler, Brasilie,
Ricardo Izecson dos Santos Leite, Aka. Kaká.
Füehle mii vore Chopf gstosse, Zwöiituusigsächs, Nummer Drüezwänzgi, Marco Materazzi, EM Final gäge Frankriich.
Ds Nummer Vierezwänzgi?
Mis Alter das isch ä anderi Gschicht.
Schicke mis Hirn i ds Komma zwüschä Kreiszahle u Vättere, blibii im Fluss, Pi, Pa, Po.
Das isch wiit härgholt wie der Sieg vo Frankrich über Italie im Sächsi.
Wiit härgholt us de News 90-60-90, nume verdräihti Realitäte, Frouebilder wo nid er Realität entspräche.
Bewegsch dii uf dünnem Iis, seit jede wo ke ahnig het dases für öppis Schlöff giit.
Erwachse worde zwüsche Marx u Maria, Trauffer, Trychler, Chrischte, Gölä, Trinker,
Pendler & SVP Stammtische.
Sie säge mir sige in Sekte.
Das seisch du wo a jeder Hundsverlochete ä Bierhumpe muesch mugge.
Muesch nid i sone Club gah hei sii gmeint
Woni vorem ne Club ha gwartet für ine, hei die wiederum gmeint ii söll nid i so ne Klub gah. Weiss nid was Gloube u wämm.
Jesus het eim es Ohr gschänkt,
Villich söttsch du o ihm es Ohr schänke,
Gott het dir zwöi gschänkt u keis weimer bruche usser mir köre Ja u Amen.
Du muesch usserhalb vor Box dänke,
Zersch söttsch höre Gott u sini Schöpfig i sone Box z'packe.
Föh mir doch aa überhoubt a Gott z'dänke, näbscht Wiehnachte.
Du blibsch gfange i däm Chaschtedänke,
wie Mönche ds Bali i däne Hindutämple.
Ä Weise Maa het mir mal gseit,
"Wes Gsetzlich würd, wirds ungsund!"
Füehle d'Gsetz, der Fründ & Hälfer fern, füehle mii Dräckig, füehle mii verletzt,
füehle mii verurteilt, zu Rächt?
Ke ahnig ii dänke scho, wemes Gsetzlich nimmt, spielt de Gott nu ä Rolle, oder steit ds Gsetz über Gott, i üsne Chöpf?
Düsteri Gedanke, sii grad nid da.
Läbe füehlt sich guet aa, klar giits Höch, Töiffs, uf, ab uf die nächschti Achterbahn.
F#ck de Shit, Perfektion öppis woni nie erreiche, okei, blibe dranne, es isch nie ganz Volländet, Michelangelos Bilder im Prozäss.
Viel Truur, viel Komplexi Theme es uf und ab, Chalt, Heiss, bald badet i allne Wasser,
Eii Tag i minere Therme, choschtet gar nüd. Suechsch Modärni Poesie, Nostalgie vo morn, de lies die Texte u Wisch witer, aber putz diner Schueh bevor d'Lyrikgallerie betritsch.
Clean muesses sii chli wie d'Usstellig im Kunstmuseeum Thun, Elena Stauffer.
S'isch nid alls i Steii gmeisslet wie bim Alexandre Farto, o wemer wette..
Mis Läbe überchunnt Farb,
Wotts nid verschlarge,
Wott dä Umkippet Farbchessel nid verteile.
Nid ds dräckele o weme ir Pfütze steit isch ä Kunst, gloub mir.
Me cha dür aller Egge vor Wält loufe u nüd mitnäh, we me gnue Ignorant isch, vo Biel über Berlin bis Hogwarts, wie der Monopolymaa.
Mängisch hei Sache e schwerwiegende Hindergrund, drum sött me nid z'schnäll Verurteile o wes nid eifach isch.
Schwer im Abgang wie bi Sons of Anarchy.
O wes nid schön isch, viel Sache Frage ufwärfe gseh z'erste mal das Läbe sich o cha guet aafüehle, dases Schönheit bsitzt wie Persischi Gebättsnischene, Muqarna.
Wett nume chli zum Nachedänke aarege wie ds Plädoyer vor Margot Friedländer.
"Seid Menschen"!

-Diego Bircher