Viel z viel Vorurteil behafte dii.
Sie gäbe dir verschiedeni Näme, Negativ,
über die leschte paar Jahrhundert,
du chasch nüd derfür für di Ruef u öppis säge dergäge isch der nid gäh, i erläbe dii ganz anders als erwartet, cha nüd schlächts verzelle vo dir, ä eigete Chrakakter äbe.
Villich will du di hesch aapasst am Luuf vor Ziit, neuartig, ned altiigsässe obwohl me das bi dire Vergangeheit durchuus chönnt bhubte.
Du lidisch, Tag für Tag under dire Namenskategorie.
Drunder u drüber geits hie nid.
D Aare schlänglet sich a dir verbii, im Grüene usse, steisch dir d Bei i Buuch oder d Wend i d Stockwärch, Es Irrehuus, aber drus gfunde hani nu ging,
We d Verwirrig, verwirrt dür die Gäng sich het g'irrt, hettis gmerkt.
E Psychi, da wo die verrückte underbracht si,
Mensche wie du u Ii, komischi Vögel.
Zu Unrächt verurteilt im Luuf vor Ziit.
Vorurteil chrütz u quer, dür d Gsellschaft gschtrickt, weni iis glehrt ha, priche chas jede.
Nu ke Zwangsjagge gseh u ke Gummizälle wo me eim Iisperrt dasme sich ned a z Läbige geit, das giits hie ned.
Es isch offe vom Morge bis am abe,
äbe kis Gfängis wie igs mir ha vorgstellt ka,
Menschenrächt gälte o hie, wie usse im Migros oder Coop oo.
Kriseintervention, wird hie gmacht.
Nach dim freie Wille, we du öppis ned wosch de würd uf di Glost, sofort chasch ga wed du das wosch.
Verschiedeni Therapie wo imne zuemutbare Abstand stattfinde u we me de ned ma de ma me de ned, Kis Urteil gfällt wird.
Es söll eim wohl sii.
E Perfekti Wohlfüehloase isch sicher anders, aber es tuet zum Wohl vo mir biitrage.
Mensche wo sich hei entschiede, nid wäg sondern häre z luege, bi däne sache wo se plage, Ehrehaft wes eine schafft sich iizgestah wenn ers nem alleini schafft, mire Meinig nah,
Mir heis gschafft,
Mir hei e Gsellschaft erschafft, wo nume nu Schafft, bis si Chraftlos i sich zäme sackt.
Ja nid la hälfe, süsch ufzmal heisst es schwechelet, I cha dermit läbe wed du die Meinig hesch.
I löse mi vo däne chlammernde Gedanke,
Wo i die Gsellschaft passe.
Wott ned abhängig sii vom Urteil vo anderne Mensche, wills nume Chraft, choschtet alls.
Lieber Usbrennt als es Timeout,
Lieber Gsellschaftlich annerkant,
als sich Lah hälfe ir Notsituation.
Lieber "Es giit mir guet?" als Ehrlich sii,
de chunnsch ned wiit, blibsch stecke ir ziit.
Tüüfi Gedanke,
Ki "Chranke Maa" ghürate, optimalfall, für dii
Aber wed ehrlig, jede het sini Hürde im Läbe z bestritte u nume will das mini, würdi ned säge das dini u die vom andere Gägenüber ned weniger abverlangt vo eim.
Der Holzbalke im Gsicht u versueche der Splitter usem Oug vom Gägenüber z operiere, Schicksal vor Ironie, wiisi Wort i vergässene Büecher, aber gläse vo vielne.
I la mir lieber la hälfe als nie Hilf aaznäh, z versuufe im Elend, lieber abhängig vo kontrollierbare Substanze als Gsellschaftlich anerchannte Mittel, Alkohol u Droge.
Es seit der nimer danke wed du wäg bisch. Grad i Junge Jahre schwer erträglich für Familie u Fründe, wed nüm chasch.
Es nützt niemerem we ds einzige wo blibt die Abläbigsbricht ir Ziitig steit u me drunder lisst was für ne Tolle Mensch du sigsch gsi, viel z Jung vo üs gange.
Leider gseh teil Mensche ke andere Uswäg u das tuet mir weh, wed aber ned Urteile will d Fäll z Komplex sii u sich dert hei abgspielt wo nume Hirnforscher zuegang gwährt isch, u o für Sie begrenzt,
oder Dichter wo müesse ufschribe was ne dür e Chopf geit.
Der Toteschiin isch o ned gratis u choschtet oo si Priis, was i dermit wott säge es isch nüd gratis, Priise z vergliche i däre Sektion isch dumm, d Ziit rennt wes z spat isch, schnäll.
Was wer i fürne Mensch weni däm mitem Härzfehler würd ga säge, er söll ned so tue u si Läbensrythmus i griff übercho,
ke Iifluss druf, aber da chunnsch du ned druf oder?
Geisch zumne MS-patient u seisch er söll ned so tue will si Huptnärv-entzündig halb so schlimm, der ganz Körper lahmleit, gsesch ned?
Der ander wo z Beii het broche cha doch nu loufe, mit Krüke schafft sichs ufem Buugrüst leider ned so guet, zu Rächt.
Aber das isch ja egal will Mental Health Month isch ja gsi u das isch ned relevant, für dii okeii.
Okeii, du gseschs e so u ig erläbes anders chumm verbii, mäld di aa u de gsesch drii.
Simer realistisch, so viel Mensche chönnte ned so guet simmuliere, mire Meinig nach.
We de würkli es Problem besteit, merksch leider ersch we bim einte oder andere z Liecht usgeit oder gange isch.
Komplexität für Dr. Med. Prof. Psychiater nu ned klar, oftmals,
Sie sii dran, gib ne die Ziit u de würsch villich o du der müesse iigestah, dass es es Problem isch, villich, aber ke Sorg bis dahäre hesch ziit i dire Meinig z verharre, ke Druck.
Solang schlah i mi derdür vor usse Sicht als ussesiiter.
Sich aber drum z tue, di z informiere isch so fern wie für mii d Heimat, liecht zuegenglich mit de Richtige Mittel.
Weme aber blibt stah u ned mal d Füess under d Arme bringt, ds Auto undere Arsch chlemmt, wirsch ned wiit cho u sälbst denn wers e Wiite wäg a de Ort wo du wisch was, wie, wo.
Füelsch dii aagsproche kis Problem du weisch genau wes um di geit, i schribe nume i dä Wort wo mir gäh sii u formuliere nume was mir so zu Ohre trage würd. Wed die Wortluute also nid kennsch, redi ned vo dir, ke Angst.
Es wird immer öppis als Gägeleistig abverlangt, Fazitshalber.
Zrügg zu dir, Im Gebäude näbedran mal gschaffet so unschiinbar u glich hesch di Platz verdient, nume will du di kümmerisch um anderi Problem als di Körperliche, bisch du genau glich wichtig.
Für mii ä Säge, grad jitz.
Liebi ufrichtig gueti Pfleger u Verständnisvolli Psychologe u Ärzt, es riese Dankeschön a öich, Höchachtigsvoll gsehni hie i Brüef ine wo unersetzbar sii, danke für dis sii u ushalte i däre ziit vo Stigmatisiert würd.
Will vermeindlich normali Lüüt hie drin sii, das gseh viel nu ned, danke für all die Liebe Nachrichte i leite se witer a dii.
I Respektieri dis Sii meh als zuvor, du bisch der best platz für mi, i däre Krisesituation.
I gseh nid alls wo du Tag, Täglich leistisch, aber i ha der gröscht Respäkt vo dir Huus Äss.
Zu dank verpflichtet Spitäler FMI, als andere wer Gloge.

-Diego Bircher