Sitze da, Sunntimorge ned ufem Chilchestuehl, sondern Stationär, ir Psychiatrie ufem Stuehl voremne Blatt Papier.
Viel frage, wies giit u werum das passiert als Christ, will Gott isch doch guet u Heilt.
Ja, ä berächtigti Frag, die hani Ihn o gfragt.
Ha villich vergässe das me Mensch isch, ned verschont vo so Züg we me Jesus im Härz het.
I ha mi oft gfragt ob das alls Zueverlässig, oder glich nume em Zuefall überlah isch.
Z Läbe hie, d'Chilche im Dorf la stah,
Jede Sunnti göh paar komischi Chöpf i di Gebäude u verherliche öppis wo si ned gseh.
Das hani denkt, ha gsuecht nach öppis vertruuenswürdigerem,
ha aber nüd gfunde bis hüt.
So hani mi entschiede, für ihn u gmerkt dass sich mini Härzenshaltig darf endere.
Ds Läbe isch kis Wunschkonzärt wo jede Wunsch woni ha eifach so erfüllt würd.
Ds Läbe ned Fair, es isch okei.
Was isch Heilig für mi hani mi Gfragt, mi la inspiriere vonere junge Frou wo Brustchrebs het u da stiit über 30 Jahr verschont ner die Diagnose u das trotzdem dass Sie het gloubt.
Heilig isch Aasichtssach, was isch wichtiger d Seel oder der Körper, am beschte beides. Weni aber müesst useläse wers d Seel, usem Stand vo hüt.
D'Drahtsitzer hei es guets Podcast drüber gmacht.
Heilig isch mengisch anders alls mir üs das vorstelle.
Schwarz bemale, luut paar Menscheseelene.
Mensche wo mi bim Pfarrer ihres Vertrauens wette ha, will dä de scho wüsst was das isch. E Chrankheit isch d Antwort wod nid wosch köre u nid dra gloubsch, aber söttsch Akzeptiere, nid so eifach z erkläre,
wemes nid kennt.
I bi froh bisch du verschont blibe bisher, will mit däne Sache isch ned ds Gspasse.
Ds Schwierigste eifach z Akzeptiere dasme nüd cha mache usser da sii, d Stilli isch mengisch am schwierigste Uszhalte.
Es cha eim erdrücke, wie e Elefant ufer Brust.
Die Schwarzi Wolke im Chopf, oder d Todesangst wo aachlopft, glägentlich verbii chunnt u luegt öb si dir ds Läbe cha Schwer mache, es biispiel da derzue...
Ha so Brustschmärze ka vom Härzchlopfe vor Panikaatacke ufem Wäg i d Bruefsschuel,
Dasi nüm anders ha chönne als mitem Roller a Bode liege, guet ersichtlich ufenere Grade Strecki, d Schmärze so Krass, kenner Träne usebracht eifach glitte, ha ghoffet i Stirbe i dem Moment. Ha der Abschiedsbrief im Portmonaie mit mir treit. E herti Realität, wo me sich muess iigestah, e Hilfeschrei, willi denn nu ned ha gwüsst was passiert i mir, d'Todesangst.
Der Busfahrer het mi ufgläse bi alwe Wägträte, cha mi nem guet dra Erinnere, ha gseit es heig mir e Zwick i Rügge gäh, er Ambulanz wo mi isch cho reiche.
Es Böses erwache u i bi ned am schlafe gsi.
Der Uswiis wäg für unbestimmti Ziit,
aber gholfe dermit hets mir nid.
Ghoffet es sig öppis Körperlichs wo sich leht la behandle, falsch denkt.
S'isch öppis wo denn scho tüüf im Chopf het gwüetet. Ha mi dürigschlage probiert i das Phänomen "Leistigsgsellschaft" z passe, bi aber aageggt, u gschiteret, ha ned dri passt, es verlornigs Puzzlestück, im Küder.
-Psychisch heisst ned outomatisch Geistig.
Alls Vergeistliche ir Chrischtliche Bubble beliebt, es treit aber kener Frücht.
Alls ds Vertüüfle wo miter Psyche z tüe het isch ned der Wäg für d Erklährig z finde, es isch eifach e Uswäg sichs liecht mache e Antwort z gäh uf öppis komplexes.
Dis Verhalte erklärt einiges, über dis Wüsse.
Süsch lueg emal d Suizidrate aa im 22. fasch 1'000 lüüt ir Schwiiz ohni Exit derzue z zelle.
Truurig das so viel vo däne so Plaget wärde, vo de Chrankheite, im Köroer oder im Chopf, dass der Tod als z chlinere Übel erschinnt.
So sii Suizidgedanke, ds Läbe nem Läbenswärt u der Tod isch nu ging der Tod, glich viel Angst dervo, es isch es Abwäge was überwiegt grad, wie Roulette es cha hüt Rot oder Schwarz sii, wed di entschiede hesch chert mengisch, d Rueh über di ii. Im einte Fall isch klar das d Panikattacke wärde ufhöre, aber so o di Härzschlag, Brutal.
Die anderi müglichkeit dir numal e Chance z gäh, meischtens si die Abgründ vo de Gedanke so höch, das me nid weiss was sich me lohnt.
Die meischte hii ki Wahl, o wes so schinnt,
mi denkt das me Unde besser dran wer als obe oder umgekehrt, ke entscheidig, ke Moralfrag, was für eim grad ds Chlinere Übel isch?
Jede wod gsesch, gseht Glücklicher us als du u würkt Positiv u du füehlsch di wienes hüffeli Elend, ned verstande u niemer cha dir würkli hälfe. Innerlich spiele sich Kämpf ab, viel wo vom Körper abhanget, d verspannig, der Angstzuestand, der Schweiss wo tropfet öppis wo me ned so eifach cha beiiflusse.
Mi muess der Körper sehr guet kenne für ds erchenne was grad abgeit u sälbst denn glingts eim nid geng.
"Chli Sport würd der guet tue",
ja weni mögti würdi,
"Du bisch doch nu Jung, hesch z läbe vor dir gsehs doch Positiv".
Du hesch e schregi Wältaasicht, i kenne ned viel anders, mit 14ni aagfange u jitz 10 Jahr speter am Ufarbeite, hoffe i chönn ii paar Jahr säge, es heig sich glohnt.
Würde angens entlah gah wieder em "Normale Läbe" nache, blibe aber nu Chrank, nid Gsund, nid gheilt eifach afe Stabil, ds Läbe chönne erhalte u jitz geits witer, der nächscht Schritt steit aa.
Das isch okei, es isch wie e Reha für ds Hirn.
Gedankestrukture dürbräche u viel Gwohnheite ablege, nüii ufbuue u witer.
Der Massstab a sich sälber senke,
schwieriger als die meischte denke.
Uf di meischte Tipps chani verzichte, ha glehrt das viel eifach afe mal druf los säge, vergliche u eim ner z Gfüehl gäh besser z wüsse was würd passe für eim.
Es isch wie e unaagnähmi Näbewürkig vo de Medis, aber das versteisch du ja ned, du muesch si nid näh u stecksch nid i mire Huut.
Es isch nume e Hilf, e Stützi u würd mi ned vo hüt uf Morn Gsund mache u das isch o nid ds Ziel woni ha, willi realistisch bi, weiss werum me die Medis nimmt.
Du hesch z gfüehl das isch der Heilsbringer, de hesch nid Verstande um wases geit.
Du blibsch dire Linie trüüi, di mal würkli drum z tue isch der zweni Wärt will du ja scho jitz z gfüehl hesch z wüsse vo was du redsch.
Du blibsch der Moralprediger wie bisher, Herzliche Glückwunsch.
Mensche ändere sich, nume d Bilder wo hange blibe glich, ä Momentufnahm, d Ziit churz aaghalte, knipset, usdruckt u ufghänkt.
Die Guete alte Ziite, imne Bild, beidi Lache zäme.
Rede drüber tuet me ned drum Schribis uf.
Es söll jede chönne läse wos wott,
ned eifach würds für beidi, Happig äbe.

-Diego Bircher