Aipods use, d Stimm verstummt im Ohr, "Chömet nume ine, Herr Bircher",
"Wo drückt der Schueh?"
Der Schueh drückt niene, was fürne komischi Frag,
Hinder düri, ds Hirni düri, versüchti Gedankestrukture siit Chindheitstage, Triggerwahrnig, es wird persönlich.
"Da isch so e schwarzi Wolke i mim Hirni, i bringese nem use, beständig, Hirngspängschtig, geisteret si obe Ine ume".
"Da giits ds einte oder z andere Medi wo würkt bi däre Symptomatik", heikel, grad wed Hochsensibel, druf reagiersch wie ig.
Ja das hii viel mir gsiit imel wieni de ds sölle het, mit däne Medis u d Therapie sig ned rächt woni machi, Studie bewieses zwar anders aber du hesch ja Ahnig...
"Es cha doch ned sii dasi der Einzig bi wo sich Einsam füehlt?"
Füehlt sich öpper anders o so?
I warte hie u verspriche dir dasi mi endere.
Gib mir e chli ziit, für dir z ziige dasis Wärt bi, denkeni u hoffe das d blibsch.
I merke wie d Unrueh iichert, I wiss dasi angens zerbriche, d Angst mir iifehrt, wie ds Notfallmedi, lescht Nacht.
Ds Läbe isch hert, das isch okei.
I ha viel Fehler gmacht, i wünschti i wüssti wie si ungscheh z mache.
I bruche ned viel, nume der Friede i däre Situation.
I hinderfrage mii doch stetig sälber, "bini gnue Motiviert, liegts a däm?"
"Bini de nu Mii sälber, mit all de Medis u was sölli de?", Aapassigsstörig, Schwachsinn, Therapeut gwächslet.
"Ha d hälfti vo mir verlore, gfüehlt alls um d Ohre gfloge, lescht jahr".
Mi erwartet dasi alls ifach ufnimme analysiere u vo aafang aa uf ds Richtige setze, was weni versäge e Fehler mache oders ned würkt, wie me denkt het?
Miner Traumas umrunde mii, d Panik nimmt zue u ds Verständnis ab, de Psychiater siit es göng mir ja eigentlich guet.
Es Guetachte erstellt, inere Stund, stempel druf abgschickt, danke Dr. Med. Herr... Iis chani nech säge, "danke für nüd"
"Nächscht Monet heiter bscheid wies witer giit".
I stah da ohni Job, verlore wäg paar schrege Gedanke, oder was?
Stigmatisiert sig die Thematik ir Gsellschaft, säge sii, ah ned wahr?
"Sie sige ki Gschützti Wärchstatt" hets einisch ghisse, woni kämpft ha um mi Job.
Sätz woni vergäbe versueche z vergässe u d Vergäbig sueche derfür, bis hüt.
8 Jahr probiert mi düri z schlah, ä Lehr u Job für Job, mi verschuldet ka, Füfstellig. Ufgarbitet, der Arsch ufgrisse u danke siit dir niemer derfür, es isch ja dis Läbe, das muessme halt chönne händle.
Gfüehlt e Versäger, nimmeni aa, "es näggi ab", so chunnts überi, d Identität fern,
Uf u zum dervo seckle.
"Wer bini, u für was macheni das hie?"
Ohnmacht, kis aarächt u ki entschiedigswärt het dini Meinig, gstüret vo usse,
kis mit, eher es gäge dii, Sozialversicherigsrächt Schwiiz.
Wärtlos, chunnts mer vor, die ganzi Situation.
Ned grad das wo me sich vorstellt, frisch verhüratet, d Welt z under obe e Monet nach dem Tag.
Ghoffet chönne ga z Reise u endlich e Job wo mir passt, Puzzlestück, es fehlt der passend Rand, Scheisse, i setzte zäme aber es chunnt ned zum ne End, i cha nume versäge denn, oder? E Gschicht woni user erschte Reihe ha chönne erläbe, ned für Mitleid z ersträbe, sondern z zeige wie z Läbe o cha spiele.
"Stationär, der lescht Bahnhof woni aafahre", hani numal gsiit am Abe bevor i da bi aaglangt.
Der Läbensmuet, d Läbensfrüüd fremd, Todesangst.
Wie sich das aafüehlt, sig welle z freue miter chline Schwester we si Geburtstag het u fiiret aber me ned ma, ned cha sig freue will Früüd empfinde siit Jahre nem e Teil isch, vom Läbe.
Vor zwo stund ned gmerkt wieni überhubts cha läbe, Happy Birthday.
Ä Elefant ufer Bust, d Atemnot wird zum gwohnte Wägbegliiter,
ds Härz chlopfet wie Wild ir Brust u führt so nume derzue bii, das d Warschinlichkiit vom Härzversäge grösser wird.
D Hiimfahrt vom Schatz, der reinscht Horror, vor Härzschmärz schreisch alls use u füehlsch di wie e Düriknallte tubel, z Stürrad der Boxsack.
We d Iischchalt Duschisch für ds merke das d nu läbsch, d öppis füehlsch u sich di Körper nu regt u wert.
Das tuet weh, villich ned im Bii aber im Härz, wed Wehmüetig vor de Hochziitsbilder sitzisch u d ned wisch wos hii isch,
ds Lache isch mir vergange i dä vergange Jahr.
D Fahrtrichtig igentlich klar, d Sägel gsetzt "Peter Räber" inspiriert, aber d Sicht vernäblet, d Wahrnämig vermöblet, es IKEA-schäftli, guet gmint u günstig zum abgäh, aber ned zueverlässig, z Spaltmas passt hie u da ned, Schrinerkunst mal anders.
We das mis Los isch, de nimenis halt aa, d Alternative, giits ned. Aber ja mal e träff gäh, d Träffsicherheit umi härstelle, d Zielschiebe vor de Uuge, will Zielsträbig dervo luufe, tüe viel z viel, will häregugge z viel abverlangt u Schmärzhaft isch. I wetti mir "Ned ds Schad sii", o für das hie ned, wes teils o tragisch, tragis ned Inzig, mit Mir e liebi Frou, e Familie u es paar liebi Mensche wo nachefrage wies mir geit u glubmer es sortiert us.
Mensche im läbe wo sich i di Egge trängt hii u ds guete i ihne gseh hesch u sich nem mälde.
Für paar Fotos hets glängt?, u für paar nem, z Fotoshooting usstehend bis hüt, aber nem umsetzbar, wills z spat isch gsi, der eint Teil jitz fehlt, das geit mir nach.
Danke für d Lehr vo mim läbe, i bruche ned 100 Menscheseeli wo mi Rüehme für wasi mache, oder bi, will i ifach cha sii bi paar wenige, wo me a paar wenige Hend cha abzelle,
Bilder endere sich bekantlig ned nume d Mensche drin,
Dankbar sii isch mengisch schwierig, grad wes eim a Grind briicht mit däre Chrankhiit. Krebs für ds Gedankeguet, Gedanke, gnue jitz, denkschter,
was hesch erwartet wed ine platzisch i d Therapiesitzig, vo mir?
"Hie das wod wosch köre u ig o wett erwähne" Danke für alls hie uf Ärde, wo mir gschenkt isch, jedi Ziit nimi i mis Härz uf, sig si nu so churz. I erhäbe z Glas für öpper wos het verdient, Schätzi i muesses numal säge, dank Gott u dir läbe ig nu hie, Danke für jedi Minute, für ds guete u z schlächte wird gsorget, wills im Endeffekt nüd bringt oder enderet, sich z wehre Sinnlos, ds Läbe isch ned fair.
Mache das hie ned für Respekt oder Lob z übercho,
I stah ned usi u wott Perfekt würke,
Das passt ned für mii,
Christ, isch ned d definition vomne Perfekte Ig.
I bi halt ned dä Typ wo schwügt,
I blibe ned eifach i däre Stilli sitze.
I bi äbe lideschaftlich u i meine das woni Schribe.
U glubmer i erwarte ned das du mini Perspektive versteisch. I het ned mal d Erwartig das mir zuelosisch,
wies mir giit, frage Pfleger u Psychologe gnue.
Es gieng mir nume drum z köre vo dir, will simer ehrlig weni dir hüt schribe wies mir giit, hettisch ned z gfüehl i welli drüber rede wies mir giit?
I schribe sache uf woni kämpfe dermit,
sache woni genau so erläbe,
das isch mini Realität.
I bi gsägnet, mit all dem hie, uf Gott vertruue chunnts aa, simpel eifach gseit aber ned gmacht.
D Ziit isch mir abgloffe, "also Herr Bircher bis nächscht wuche".
Aipods ine Nate feht witer woner het ufghört singe...

-Diego Bircher