Scho fasch meditierend sitzeni ufem Couch
Di leschte Sunnestrahle lüchte vor siite i miner Uuge.
Di Uftouete Wassertropfe, sueche der Wäg de wässrige spure vo mim chürzlich kühlte Bier entlang, richtig Saloontischli.
Es tuet guet, über di nachi z denke.
Viel Bilder si blibe die einte gstoche Scharf u es paari chli verschwumme,
weisch nu womer am Turnier z Därlige hii zäme gäge ds einte Team gspielt wo därewä bsoffe isch gsi das si chum meh us de Uuge hi gseh u meh am Bode si umegrutscht als der Balle nachi? Der match himer schier müsse abbräche will sii därewä grob drii si.
I wiss nu de Moment bi Riiches dahiime ufer Terasse wo mir zäme es Bier zwü ir Nacht hi gnosse u du mir das Lied hesch ziigt, vo Coldplay, "A Sky Full of Stars" muess das gsi sii,
Oder wo mir bi dir dahiime hi Tennis gugget, mit paar Kollege u dine Brüedsche.
I has o gliebt mit dir z Schutte, diner Päss si wie diner Schüss gradwägs cho, mit verlass, jedes mal
U de Dis lache wed hesch gmerkt dass me hüt ned z verbisse derhinder muess, isch unbezahlbar gsi,
Di Handschlag nach jedem kämpfte bowlingfight z Spiez.
Dini Hiigab u dis uf mi igah,
i däre Ziit wos mir wie o dir ned guet isch gange, für das bini der Ewig Dankbar.
Im Früehlig 22 hi mir ab und zue ustuscht, du hesch mir nu gschribe ka, das di wie nüi Gebore füehlsch.
Läck isch mir e Stei vom Härze kiit, aber scho glii drufab isch mir de ume ufem Weg begägnet.
Es gangi der ned so guet, isch eini vo de leschte Nachrichti gsi, wo uf mim Handy isch ufplobet.
A däm Abe wo mir als Boys si zämeghocket wie jede Fritig, plötzlig z Handy lüütet,
u e Nachricht druf isch,
dass du furt gange bisch.
I bi ufgstande u ha gsiit, chunnt ihne mit cho sueche, will wes 1 Chance giit, de wetti ned dä si wo se ned het probiert.
Ja mir hi aller gwüsst u glich ghoffet dass dii a dem Abe di dunkle Gedanke ned überrumple.
Nach paar Stund erfolglosem Sueche, bini iz Bett u ha wohl oder übel am nächschte Tag festgstellt, dass die Nachricht uf mim Handy stiit...
I füehle nu ging de Schmärz u es macht mir mengisch Angst, dass das wo dir isch Widerfahre u mi chönnti träfe.
Die paar Schritte dür d Ufbahrigshalle,
uf z mal stahni schneller als erhofft u erwartet vor ihre, -fassigslos u ohni Wort, merkeni wieni ihre d Hand gibe u nüd säge, i schwüge.
Wills nüd passends ds säge giit, i dem Moment.
I stah paar Meter usi u da gsehni e riese Menschemengi, wo sig het versammlet für dii ds verabschiede.
Du bisch ine vo de guete gsi.
Das Bild a dim Grab mit paar Rosebleter ir Hand u der Blick uf dini Frou grichtet.
Ihres verzwiflete Truure, wo bis hüt dür Chnoche u March giit u e Ohnmacht mit sich bringt.
Dass Bild isch so tüüf verankeret,
dass jedes mal wes umi fürechunnt,
S tüüfi Truur verursacht.
U so spielt sig im Ohr o vo Coldplay e Song mitem Titel "Everglow".
I wetti dir ifach numal säge, was du für mi bedütisch.
Es isch so es Privileg, lüüt um sig z ha, wie dus bisch gsi.
Du hesch mir so viel gäh,
Sache wo viel Lüüt alwe ersch nah dis nah wärde vernäh.
Du hesch mir der Wäg gäbnet, dass das hie überhupts i frag isch cho.
Dir verdankeni o ä teil dasi nu darf Läbe,
Mi ned ha müesse inzig füehle i mim Lidä u dasi offe drüber cha Redä.
Sit dim Tod, hani z verlange nu meh übercho, Mensche z sensibilisiere für die Chrankhiite wo imne vermeintlich Gsunde Junge Körper, verborge chönne, wüete.
E Chrankhiit,
Krebs für z Hirn u d Gedanke wo genau glich cha cho u gah u leider o zum schnelle Tod cha füehre.
I wott Kämpfe dergäge, mit allem wo i mire Macht stiit, das hani versproche,
I vertrue druf dases Gott guet meint,
Er mi gseht u wie bi dir, d Chrankhiit brucht als Wärchzüg für anderne z hälfe, im Läbe.
Du blibsch i mim Härz, tüüf ine.
U i freue mi dir z begägne, di Handschlag entgägä z näh,
Im Himmel bimne kühlte Bier ufer Terasse...
...Prost, z nächschte Bier tueni bewusster als jedes andere uf, i bhalte di i Ehre als ine vo de guete u trüüie Fründe.
Es Bier für d Seel, wie der Büne singt "Für immer uf dii".

- Diego Bircher