Gschmückt mit Loorbeere,
The Cranberries Zombie.
I vielne Beziehige bini mir unnützt vor cho.
Bi mir irgendwie usgnützt vorcho,
We ds Härz einisch abenand isch,
bruchts viel Pfleg,
Ke Wiederhärstellig müglich, kes zrügg, d'Flucht nach vorne,
Sie wei dii für dumm verchoufe wie in Sekte.
Ke Blick zrügg, witme mii däm weni chli spatzig ha u das hani jitz nid.
Bii am Gitter vorne aacho, gmerkt mini Emotione hei es Änd.
Sueche nach Puzzleteile, i mire Zälle.
Rüefe nach Hilf, köre nume z'Echo vor Stilli,
Muessi mit mine Wunde sälber klar cho oder chunnt der Barmhärzig Samariter.
Ha niemerem welle uf d'Füess trätte, drum hani dänkt es isch fair de beste Fründe z'verzelle, dasi zrügg zu Gott wott.
Ha de Schmärz die leschte Täg ume ir Brust,
Has gmacht us Liebi.
Es tuet mir weh z gseh wie Mensche liide, usser bi mir, das kenni siit Zwölfii.
Ha Jahre dänkt ii heigs verdient.
Sueche nach Wunder i mine Wunde,
Gfunde hani nume meh Schmärz,
Härzzeriss, Kärr mit mim Hirn.
Cha mini Chinderbilderbüecher aaluege,
Erchenne mii nid drin wieder als weres
Bilder gschosse vo mir, wo nume anderi Persone abbilde.
Ke Ahnig wie dä denn mit all dem Druck isch z'schlag cho,
Weiss nid wie das Blatt Papier mit dem Druck cha klar cho.
Ha versuecht nä z'töte, für de andere Grächt z'wärde, dass hett sich Gräächt,
Die leschte Jahr.
Ha versuecht näh z'ersüffe im Gedankemeer,
Är isch immer wieder uftoucht,
vor mim innere Oug.
Ha dänkt i cha dir eifach d'Luft abschnüere,
Bis ii sälber Atemnot ha übercho.
Im Null Komma nüd, bi gfange uf dem Stuehl wie im Koma u köre Stimme.
Würdi uf die lose, weri scho lang wäg.
Wett das Härz userisse, aber es geit nid,
wett dii la usblüete, aber weiss nid was mir ner Blüet, wie der Grund u Bode underem Lavagsteii, wener vergeit, villich Grasgrüen, Pächschwarz i cha nume Rate.
Wett dii ufem Tisch verschmättere, aber weni das mache stirbi dran.
So schön Kaputt wie es Mosaik ufem Grund.
Stah ufemne Huufe Schärbe, Simon Berger.
Ohni Härz funktioniereni nid.
Sie säge mis Härz sig öppis Wärt, werum verblüeteni im Bluet u nid im Gold,
Es louft mir dür d'Händ,
hangeblibbe isch nume e chline Arteriefade,
I hange dran, alls hanget dran als wers d' Klinik wo am Siidene Fade hangt.
Mis Läbe, mis Stärbe,
Z'Sträbe nach vergangne Ziite,
Nach vergangner Energie u Chraft.
Sueche nach Liichene im Chäller,
als hetti e Job ir Mordkomission.
Die Monster underem Bett, zeige sich,
Sitze ufem Eggbank, gschoue id Rundi,
vo de verschiedene Ouge am Tisch.
Hocke mit mine Gfüehl i däm Kreis als wers mii Stammtisch, underersts Niveau,
Blödi Sprüch, Zynisch.
Dräiheni nume Rundene, fahreni nume im Kreis, Kreise über Gfahre, wie Aasfrässer.
Es isch ds perfekte Verbräche, üsserlich z'lache u z'Läbe derbii innedrin z'Stärbe.
Der Tod wartet geduldig, ufem andere Seeufer u ii Ruedere Vorwärts ohni Chraft mii am Läbensänd däre Frag vom Läbenssinn z'stelle, drum bhüet mii Gott.
Z'viel wo mit Ihrem Läbe für Depression hei zahlt, zweni Ufklärig ii Schuele, mä luegt de we der erst Suizid düre isch.
I wünsche dir das du nid füehlsch was ii,
Bruchsch Hilf, suechsch oft vergäbe,
Wähl d'Nummere 143 die chöi i dire Not hälfe.
Niemer sött sich Alleini füehle,
Einsamkeit isch der Tod für d'Menscheseel.
Es isch Movember, Verdammte Novämber, pass uf dii uf u la dir la hälfe, es isch kes Versäge, es isch ä Wäg.
Mini einzigi Hoffnig näb Gott, d'Therapie u Musig, öppis wo Verständniss schafft, es Stück verstande wärde.
Mis Kryptonit isch was vergange.
Mii Hoffnig Morn, was ii cha ändere isch z'jitz.
I mache witer solang mir d'Läbenstinte nid usgeit, solang i mini Läbenslinie nu ma zieh.

-Diego Bircher