Seife, Chrischte, Renne,
Himmel, Donner, Stärne, Nacht,
Kupfer, Bächer, Moscow, Mule, chüehlgstellt.
Frutige, Bahnhof, Natale, Pizza, Perfekt.
Kandertal, Kultur, Inspiration, Zryd Björn.
Zwüsche Böse Buebe, Schwierige Meitschi,
Verbottne Frücht, Gschiedne Geister kreise Gänsegeier, über Fuuli Hünd Philosophieri nid wie Berhard Diener, Schribe aber gfüehlt Büecher über z'Läbe, wie mä cha z'Einsam u Depressione Überlabe.
Bruche chli Realness, Rap, Suic*de vo Ren,
Chranki Scheisse wie d'Durchfallquote bii Automobilfachmänner.
Schweri Depression isch wie mitemne Tourniquet ume Oberschenkel loufe, nume so Semi geil, ds Bluet stockt u der Atem oo.
Du chasch nid alls im Läbe so Wäggstecke wede zmitts im louf bisch, wie Kurssetzer.
D'Lyrikgallerie isch wie ä Post,
Ä Briefumschlagplatz ds Härkingen.
Tue mit där Chrankheit wie d'Psychologie ir Medizin, chli hinder här hinke.
Stah vor gschlossne Türe, wissi Chitle u Versicherige wo mir wei Wiis mache dasi z'Chrank bi.
Sie säge mir, da Obe sigi unusgliche, ke Angst bi öich une us isch das doch z'gliche.
Sie säge üs, mir sige hinde drii,
villich im Job, aber nid ir Persöhlichkeitsentwicklig.
Loufe ar Enstlige, dänke über das Läbe, d'Kunst, d'Wält, d'Kultur, z'Erbe.
Swipe, nächscht Song, Lucky Flociano, Näbel.
Öppis brennt mir ufer Zunge wie ä Stumpe.
Verletzti Seele tüe Sache für speter ufbewahre ums när vorzwärfe, für öppis mit Druck voraaztriebe wie Schlepptender.
Wort hei i de falsche Momänte ä z'chline Würkigsgrad wie Dampfloks früecher.
Ha glehrt, für user Äsche z'stiege bruchts zersch das Füür wo dii fasch verschlingt, ersch we das überwunde hesch, wachsisch.
Mii Chopf rouchnet grad, wie Chrissasthüffe.
We ds Tal benäblet, binis oo.
Mis Hirn Mystisch verpackt wie die Bärge im Näbelschwadeschleier.
Die Spitze hange fest ir Näbelobergränze.
Es isch nid alls Locker flockig, wie versuureti Milch, Fätze im Tassli wo usgseh wie Näbelfläcke am Wisse Himmelzält.
Du chasch Ewig nach Verständniss sueche bii Mensche mit unwüsse, du wirschs nid finde.
Verlange nid dass du finsch, sondern dii uf d'Suechi machsch, wie ii, will du s' Wärt bisch.
Z'Vergangne söttsch nid verflueche, es isch immer nu ä Teil vo dir, es Stück vom Chueche, wo dii usmacht.
Ha glehrt, Therapie isch nid es Spure verwüsche, sondern Schritte z'mache, z'versöhne mit dem wo isch gsii.
Friede findeni, so Gott will.
Er wählt sini Wärchzüg weise, sini Entscheidige hei Gwicht, wie der Frei Wille.
Dini Ouge spiegle sich ir Sunnebrülle wieder, Glasig, Dunkel, undurchschoubar.
Dä wo mir nüd Vormacht, isch der Spiegel,
De lachet mii nid us weni Truurig bii, wie Gott.
Ds Läbe isch wie es Chartespiel, gspielt isch gspielt, du chasch die Charte wieder zrügg näh we du vo de richtige Lüüt umgäh bisch.
Nume wüsse ner aller wasd ihr Hand hesch u bereit bisch uszspiele.
Im Läbe überleisch besser was de a Tag leisch, wie bi Wizard, süsch machsch am Änd nume Minus o wede im Plus bisch.
Viel Über- anderi Underschetze sig,
so verliere Beidi Parteie ä Teil vo sich.
I tue nümm i Frischhaltefolie iliire, ir hoffnig es blibt wie denn, wett ke Ziit zrüggdräihe, wett vorwärts gah mit all de Rüggeschmärze u däm Päckli woni mittrage.
Die Texte sii mis Kintsugi, Porzellan Schärbe wo zämechläbe, wills ä Wärt söll ha o wes nu zerbroche würkt für Jahr u Tag.
Vergäh heisst nid vergässe,
Vergäh heisst nid verheilt,
Es bout nume ä Basis, für Heilig.
Es isch ä Goldschmiedi, es isch wie bir Moral vom Rumpelstilzli, oft isch nid drin wies vo usse schinnt wi Goldmedallie vo Olympionike.
Schliesse mit paar Gedanke für ufem Wäg.
Ha glehrt reins Wasser hinderlaht ke Durststrecki nid mal Schnee vo Gester,
usser bi Nestlé, dert isch alls müglich.

-Diego Bircher