Sitze im Schwachbelüchtete Ruum,
ds Schwedeofefüürli erhellt d Szenenerie.
Gseh vor mir alls nume umrandet Schwarz & Wiis.
I ha mini Reis planet, a ds andere Endi vo der Charte.
Leng wie Breit isch der Wäg zum Ziel,
Am Afang strukturiert u gfestigt, wie e Festig.
Es feht aa,
Im richtige Moment der Richtig Iisatz ds gäh isch schwierig.
Die dunkle Gstalte vo äne für,
wandle chrüz u quer i mini Richtig.
U churz drufah stürtze die erschte Figure, abem Spielfäldrand.
I denke churz a mi nächscht Schachzug.
Gseh ir ferni mi Gröscht Gägner
Vor mii hii, schiebeni es paar chlini aber glich bedütsami Figure,
wo mir Taktisch gseh sölle diene,
das Spiel hi ned ds verliere.
Aber was söll us all dem wärde,
Es Chaos,
I cha gfüehlt nume verliere.
Zug für Zug chumeni mim Gröschte Angstgägner, äbewegs entgäge -gsetzt, necher,
dernäbe denkeni,
es fühlt sich a wienes Spiel wo ned Real isch,
I Kämpfe mit mire Gröschte Sterchi,
die gseht aber insgesamt mire gröschte Schwechi je necher si isch,
erschreckend ähnlich.
I versuche se rund um z beschütze,
mit de verfüegbare Ressource, wo mir blibe.
Z hin u här nimmt si luuf, oder si Zug
Bis jitz wisi ned öbi uf z richtige Zugpferd, -ha gsetzt.
Was söll me drus näh?
Di gröscht Gwinn forderet Verlüst,
u egal wie dus darstellsch,
Es isch u blibt es Schachspiel.
Öb ds Fäld Schwarz oder Wiss isch, entschiedet der Usgang ned.
Aber uf weller Siite du stisch,
Für dis Härz z beschütze muesch viel um di um verrücke u verdecke.
U egal wie gwiift u schnell du denksch,
Änet für isch immer öpper wo o denkt, lenkt u versucht diner Schwechene usznütze.
U öppis i all däm isch fasch unvermidbar, z Buureopfer, ganz klar.
Langsam chumeni mim Ziel necher,
Wer jitz Wer Schachmatt setzt oder gsetzt het,
I wünschti i wüsstis,
aber gwüssi sache vernähme mir ersch z lescht, ir Hoffnig dases ned ds Spat isch.
Danke für ds Läse, i hoffe du gsesch d Nachricht,
zwüsche oder näbe de Zille.
U jitz viel Glück, mit dine Züg uf dim Schachbrätt.

Diego Bircher