Du bisch wiit härgreist, mitem Schiff warschinlich, ohni vom Reisebüro vermittlet,
Bisch altiigsässe, aber dis Naturell besteit drus bewegt z wärde,
Dini Schnittigi Schnöuze,
zeigt sech nid nume im beschte Liecht vor beschte Siite, die um di um wo dir nacheluege mit Niidische Blicke,
O sii zeige sich, we si sech under d Menschemengi mische, nume vor beschte Siite.
We si di Chrütze ar Chrützig, Chrütze sich d Blicke mit dine liecht flackernde Ouge abhängig je nach je wir viel ds Gaspedal sich leht la achedrücke, die Glänzigi Huube,
drin wiederspieglet sich ihres Gsicht,
Bi dim aablick, dräie si düre.
Nid am abe, lieber übere Tag.
Der Zeiger geit bi dir nu Waagrecht u ds einzige wo dreiht isch ds Grosse Stüürrad u d Redli wo di mitem Bodepflaster verbinde, Verbindlich, wie der Name vo dim Vorfahr
Vor druffe es Ross u hinde dran e Hengstartige Name,
Wo jede kennt, wo sich chli uskennt mit de 60er Jahre, die goldigi Ziit vo dir.
Die einte nenne di sogar Veteran, nid will du imne Chrieg e entscheidendi Rolle hetsch gspielt, nei will als a dir Ächt isch, es Original,
Kes Zeiche vo billigem Züg, Kenner Chläbräschte vo ned Originale Chläbere.
Früech erchennt hei nume wenigi das du z Züg hesch derzue,
E Ikone ir Wältgschicht, vom Outo.
Hüt bisch Legendär u nüm durchschnittlich wie i de 60er Jahr.
Steisch der d Redli, Rostig i Ranze,
Roste tuesch zwar nume we eini nid uf dii luegt.
Die ganzi ziit wartisch vor dii hii, fürne Sunntimorge wie hüt.
Der Hindersitz,
der Chindersitz vo dim Bsitzer,
kenne tuesch ne scho lang siiter Chindheit u er dii o, er het sich verliebt i dii.
Es komplexes zämespiel, zwüsche anenand kopplete Komponänte, bringe di i fahrt,
we d'iifahrt achefahrsch uf de heisse Pflastersteine im Summersunneschiin.
Du chasch eigentlich z gliche nume bisch,
e chli umständlicher als der ander,
Lislig Charre näbe dran, ir Garage.
Du muesch albe ume chli id Gäng cho,
Ja, we me dir mal ds Pedal drückt,
der Most sich vermischt miter frisch aazogene Luft, ds Gmisch stimmt,
d Chraft sich unbändig entfaltet u ufer Hinderachs lastet,
Müesse viel mit erschrecke feststelle,
nid nume die schreckhafte Mensche, luege uf
u es versetzt se i ds Stuune, wed ine entgäge chunnsch, dini Massivi Art isch unverkennbar.
Acht Zylinder wo schaffe, guet iigloffe, ds Öl schiesst dür diner Chalte Veneartige Leitige wo sich dür de Motorblock schlängle,
z Läbe i dir erwachet, bis d Öltemperatur stimmt bruchsch du zwar dini Ziit,
bis d uf tuure chunnsch,
aber wed mal uf der Tour bisch,
liferisch ab, zueverlässig.
Di Versteckt di Bsitzer will er Angst het du chönntsch me entfalle will du chasch ihm nid gstohle blibe, das wer ds schlimmschte für ihn, würds nid über z Härz bringe we du ihm würsch gstohle wärde oder e Motorschade erliede.
Aber jitz ar Sunne usse fühlsch di wie Frisch gebore, gniessisch die Ussicht die Warmi Luft ar Seesiite entlang, der Seeduft ir Luft,
Brummlisch öppis vor di hii.
O we du ned so viel Usfahrte gniessisch, gniessisch d Usfahrte immer,
Wed usse ar Frische Luft, chasch gas gäh u d Lüüt di aaluege merksch, trotz dim Stolze Alter bisch wie neu, äbe guet G'alteret.
Di Wert keit nid so schnäll wie de wo näbe dran, sich Tagelang abmüht, will du guet erhalte, s Wärt bisch trotz dim Alter.
Dis Alter bestimmt nid di Wärt u o we sech anderi zu stolzere Priise verchoufe isch Aasichtssach ob si de würklich de Wärt hei wo si aagäbe Wärt z sii.
Nume will vo usse e Wärt bestumme wird seits nüd über di eigentlich Wärt us,
Will di Charakter wod a Tag leisch, dir niemer cha näh, ä Oldtimer äbe.

-Diego Bircher