Zuckertour, Carambar, Füfer Mocke, es Schläckseckli, wo me sich het Zähn usbisse dran, ds Gsicht verzoge bi Centershocks.
Fründlich, ufgstellt, zuvorkommend,
Guet chönne Rede, d'Lüüt ume Finger gliieret, wie ds Garn bir Grosstante daheim.
Stah Gopfritstutz am ne Kiosk u läbe z'Läbe.
Puste cool das Mähl zwüsch de Zähnd use,
Die guete alte Tage, wo me nume a Chätschgummizigis isch blibe hange.
Näbe Millionelosschilder vorusse gstande,
wo nid viel hei usgseit als viel Chance, chli Armuet u wenig Gwinn.
Fasch wie mini Gedankegäng, jitz.
Wo bisch blibe, Wo isch die liebi Ziit häre?
Mis unbeschwerte Lache, so liecht verdoulich wies isch gsi, vergange.
Der vorhandnig Rouch ziehni id Lungegägend ache, lane use u so blibt er verhange wie d'Gedanke ir Luft chläbe.
Sie hei mii nid welle, der Gloube isch z'viel gsi,
Vo eim Tag ufe ander une düre.
Vom Klasseclown zum Ärnst vom Läbe.
Vo Hundert uf Null i under Vierezwänzg Stund.
Nüd Chindischs, uf Erwachse tue, Chindlich.
Was sitt denn isch passiert, nüd schlaus.
S'isch nid der Hammer gsi o nid die ganzi Wärchzügchischte weds wosch wüsse,
eher ä Niete, wie Sie mii o gnennt hei denn.
Der eint het mir versproche, dass mis Läbe d'Höll wird, hätti denn gwüsst dases nume der Krater vo Derweze isch woni düreschritte ir Schuel u ds Finale nu uf mii wartet,
hätti viel früecher ghandlet.
Aber jitz bini da, bi gschwächt aber Läbe nu.
Z'Härz pumpet zwar nume nu so Läb- u Lustlos vor sich hii, für das wos vorher het gschlage, schlehts nüme.
Ä Hülle u innedrin es Skellet, wo funktioniert u sich aapasst, i Egge gstellt, was isch gsi, isch Vergangeheit, u Gägewart zuglich.
Stah näb de Schueh wie der Huusiigang,
Loufe gäg d'Wand, weiss nid wo der Usgang isch, i weiss eigentlich überhoupt nüd, nid mal wie der Usgang wird sii, vo däre Gschicht.
Giits es Happy End, isch mis Läbe ä Blockbuster, geits um Liebi, ischs es Drama,
ä Thriller, alls zäme oder z'Ächt für die Wält.
Mis Läbe wie di Persischi Chuchi, mir z'deftig.
Ha se Wägg gstosse, die um mii um, für mii i Rueh u Einsamkeit chönne Kaputt z'dänke.
Mobbing wo zu Sälbsthass füehrt isch ds Perfekte Verbräche, es hallt nache u chunnt zrügg, zerstört dii innerlich, wie ä Boomerang mit Scharfe Rasierklinge dran.
Verblüete chasch innerlich ohni dases öpper vo Usse bemerkt.
Gäg usse chasch schine u gäg inne klari lääri.
Bruche ke Bildschirmschoner für miner Texte z'schribe, nimese ungfilteret wie Panikattacke.
Wett füehle dasi Läbe u mii nid so füehle als weri hie Lebändig begrabe.
Mi Körper brüchti Rueh, chli Stilli, doch die Stilli wo mi Chopf mir bietet, isch huere luut.
Der Vorteil isch ii verstah irgendwie meh, villich wills sich aafüehlt als wer die Lääri u dä Schmärz zu minere Muettersprach worde.
Sie drückt zwar ufe Wundpunkt wie Tattoopen's, aber d'Texte & Therapiä sötte mis Coverup wärde.
Ds Alte vergeit destwäge nid aber sälbst wes nid vergeit söll ds Nüiie passend drüber gstaltet wärde, bis ii Läbe oder Stirbe dranne.
Es isch Schlächt verträglich wie Hennatattoos, vo schlächter Qualität, nume das die chasch abchratze u d'Seel i dir inn nid.
Vom Offehärzige Bueb zum verschlossne Härz, has la riife, miter ziit wie es Fossil ii Stei la iizieh, wie es Tee oder ä schlächte Spruch, das tuet mir henne Weh z'gseh.
Wirde Müed vom Bätte, mis Härz verstiift sich u füehlt sich aa wie ä Klettverschluss, sobalds verhäbt, risst wieder uf u zieht mir när der Bode under de Füess wäg.
So isch ds Läbe gsii u d'Emotione u Gfüehl sii dran z'Grund gange.
"Jede überchunnt mal öppis ab".
"Jedes Härz het mal weh ta", i weiss.
Cha nid meh usser mir paar Tipps useschribe wie im Restaurant um d'Egge.
Bis Reflektiert, dir dörfe Fähler passiere.
Hinderfrag dis Handle,
Dänk nid z'tod,
Chumm zum Punkt,
Los nid uf dis Härz,
Es isch ä guete Massstab,
aber ä schlächte Ratgäber.
Gäld macht gierig,
Es spielt ke Rolle, la se ihres Gäld verdiene,
Es isch nume Näbesächlich wie Kursivgschribes i Wichtige Texte.
Meh isch mengisch weniger u Weniger meh.
Der Tüfel chunnt i Prada u Jesus nume
mit paar Verschrissene Hudle, Bluetverschmiertem Gsicht, Chrütz ufem Rügg, Dornechronegstrüpp ufem Grind.
Was d'Quintessänz vom ganze isch?
Das d'Wahrheit nid so schön isch, wie me se gärn hätt, Schein < Sein, das isch hie d'Frag.
Nid aller guete Mensche meines o guet,
u nid aller wo dii Verletzt hei, heis mit böser Absicht gmacht, dänk draa.
Hinder jedem Mensch wo Vergibt, steckt ä Mensch wo weiss wie schwär ä Sünd lastet.
Würfe de Bättel nu nid häre wie Kapitulierendi Soldate u Strassemusikante, gibe mi nid so schnäll gschlage i däm Chaos oder Läbe,
ke Wärt, nenns wieds wosch.
Es geit uf u ab wie Temperatur im Norde.
Ds Uppsala, geits oft Heiss & Chalt zue u här, wie uf där Universität, versuech nüiis,
Mach mal öppis, Anders, hei sii gseit.
Mach die Grad, Celsius, setz die Skala uf Null.
I mine Gedanke sii meh Ehremitglieder,
als ir Leopoldina, wo du ä Teil dervoo bisch.
Wasi wott säge mit däre Passage, mit dire Passion chasch i de Chöpf blibe hange.
Üser Vorfahre hei üs der Wäg bahnt u hüt wärfe mir Still paar Blueme uf ds Grabbeet u merke das mir viel z'wenig Danke hei gseit.
Chumm mir luege das die Bahn für üs nid abfahrt, das cha nid ds lestschte Tram sii u o wes villich nid die leschti Chance isch.
I wett dir glich es chlises, i danke dir da lah, du bisch ä Säge u blibsches.
Z'lescht churz ä Retrohommage a Lo & Leduc,
Es Danke isch Verhältnissmässig öppis Minnimaus wie d'Fründin vom Micky,
Guets überlege, i schliesse.

-Diego Bircher