Locke wie der Tätel hetti, wenner d Haarlengi lenger bhetti.
Ine wo me sich ned cha uslässe,
aber aagmässe bisch u e Massgschniderete Aazug bruchsch, du verstisch.
E Promi wo dis usehe beschribt, i würd säge 70er Jahr Angus Young, ifach chli anders druf.
Dis Gentleman hüeti isch dope u passt wie der Huet uf ds Houpt, oder so.
Du bisch meh als e Brüetsch,
du bisch e Legende im Fründeskreis d Sprüch maches us, Heimlifeiss, mä kennts.
Ja mä kennt di ned anders, bisch eifach es Original.
Di Surferlook wo niemer weiss öbs di Gschmack isch oder öbs nüd anders giit i de Läde, wo du eher Muetwillig häregeisch für meh oder weniger Freiwillig iizchuufe.
Mi gröscht Respäkt verdient mit was du vo dir gisch, di Wäg gmacht u mine oft erliechteret, viel gseh u erläbt vo de Fuessballfights wo mir hei ka Jahrelang, die Youtube ziite wo mir nes Stundelang zäme hei chönne vertörle,
Uf Bali gange dür d Temple gwanderet,
ufem Tomorrowland nes der heftigsch Rave gäh wos giit uf Ärde, es einmaligs Erläbniss, woni mit niemer anderem wetti wiederhole, we du ned derbii wersch,
d'Luftmadratzi sines entgäge gschwumme will mir ned die ganzi Zältabdeckig hi bi üs ka, ds Zält gfluetet, aber dicht, zminscht unezuechi.
Bi Riiches ufer Terasse, wo d der "Bartender" hesch useghenkt u üs statt Grenadinesirup frisch fröhlich Likör ids Glas iigschenkt, zum Glück isch ja süsch nu ki Schnapps drin gsi, Schicksal vor Ironie, danke für dä Abe,
da hani nu ine z guet da chasch dir sicher sii, aber ned ine wo du mischisch.
Oder z Spanie wo mir d Ziit hei müesse z Tod schlah mit Billiard u em Plüschtieroutomat.
Ziit verinnt schnäll u Rückblickend ischs e gueti Ziit gsi, viel nachidenkt ir leschti d Gspräch gschetzt,
Du hesch mir viel ermüglicht, viel woni chönnt ufzelle woni dankbar bii für dii, i hoffe du merksch das. Dank dir weisi was Bruederliebi heisst. Was wer mini Chindheit gsi ohni dii, du hesch gluegt, bisch dir ned ds Schad gsi, hesch mi Gärdet, viel wes drunder u drüber gange isch i mim Läbe.
Griift im Glube vo dim wüsse wo der hesch asgeignet, gstuunet wie du eifach machsch u mit all dem z'Schlag chunnsch.
Ds Läbe e Kampf o für dii, mengisch verlangts viel ab, aber du bisch gwabnet für viel meh als du denksch, will dis Arsenal hesch ufgrüstet u bereit bisch für die Kämpf, pass uf dii uf u häb der Sorg u wed mal ine bruchsch wo der z Züg usem Oberste Regal, de wisch ja i bi für dii da.
Ni jitz mal ohni scheiss i liebe dii, schetze dini Art u diis sii, dini Gägewart isch eifach so unzwunge u irgendwie liecht.
Du bisch der Wahnsinn, e liebenswärte Läbensgefährte. Danke für dis offene Härz u die offene Ohre, i schetze dii mega fescht. Das isch entgägegsetzt de Erwartige ke Liebesbrief nume e Homage a dii als andere wer ja...
...du wisch was i wott säge.


- Diego Bircher