Us de Lutsprächer tönt,
Schachtar gäge Gent,
Der Radio spielt Mundart,
als wers ä Kunst u ke Sprach.
Has Akkustisch nid verstande,
Kenne kene wo ke Dialäkt Red.
Sie säge ii sig z'Jung für wieni mii Artikuliere,
Ii sig z'überleit, meine i sig z'Nachdänklich.
Ha glehrt z'überdänke, dases nid gäg mii verwendet cha wärde, danke für dä.
Füehle mii z'Alt für de Chindergarte,
Bii Zwöiitusiger Jahrgang,
Ghürate, aber Gschide mit mir Seel,
Ds Härz passt er Seel nid,
Wie mis Härz schleht,
passt em Chopf nid
Es schleht mir uf ds Gmüet,
Liegt mir schwer im Mage.
Ha Löcher im Chopf u Narbe im Härz.
Neurone kreise, z'Läbe im Schmärz.
Bi gfange zwüsche mim Name, mire Idendität u mine Vorfahre, füehle mii scho wie der Bligg.
Gloub mir es tönt besser alses isch,
Stah ufemne Blattsalat us Seegras,
Churz aber deftig, Rutschig, Vorsicht,
Wagä ke Schritt vorwärts,
Ha mii nid derfür,
Es isch mir derwider,
Alls Spricht dergäge,
Blibe stah im Trüebe Tümpel, bi mit eim Beii im Seich als weri ä Krannich, im seichte Teich.
Bi ke Doppelbürger o we paar dänke ii sig Irr,
Findi nid, has la abchegge,
Ha nume chli Französisches Bluet,
o weni grad nid Bordeaux trinke.
Ha siit Wuche, Zwangsgedanke, Schlafstörige,
Nu meh Panikattacke u Angstzueständ
trotz de Medis, steigere mii zminscht mit de Milligram, das isch o scho öppis oder?
Der Blick id Seel tüfer als iz Geht nicht mehr.
Mis Lache lügt, Lache sache z'tod.
Sache wies mir geit, d'Psychologe hei
z'gfüehl ka es göng mir guet.
Ha glehrt dasi allne muess zeige, dasi alls mit Links mache, obwohl ii Rächtshändler bii.
Dasi alls muess im Griff ha o wes Usserhalb vo mire Armlängi steit.
D'Psychologin giit mir Hoffnig,
Ha villich ä Egge ab, derfür bringsch mi nid so liecht um dä Egge um,
Wie sött das o gah, die Wält isch Rund.
Gibe der Löffel hüt nu nid ab,
wie ä Stärnechoch ir Passion.
U sälbst we morn mini Sanduhr blibt stah,
Hoffeni das öpper es guets Wort het iigleit.
Z' chörndli z'Gross isch gsi u 's witergeit,
Frage witerhin Frage, als wers es Gebätt,
ä Bitt a Gott, ä Spit über d'Depression.
Chumi zu de Gfüehl, am Änd?
Chumi zum Änd vo de Gfüehl?
Bini am Änd mit de Gfüehl?
Füehli scho oder gani so.
Ha Angst z'erchenne, dass am Änd das mini Emotione chönnte sii, dass das alls isch gsi.
Schmiere mir solang iis nid weis chli
Honig um z'Muul, als hätti ke Aastand.
D'Vergangeheit isch dini Gschicht,
Morn isch nume es Grücht,
D'Gägewart z' erläbe isch es Gschänk,
Läbe im Gester, Sorge mii um d'Zuekunft,
D'Gägewart: mis Wartezimmer für Morn,
Morn isch Gester nu nid gsii,
Hüt isch angens Schnee vo Gester,
Der erst Schnee isch zäih,
Du gwönnsch dii aber dra, miter Ziit.
Reflektiere Gester als wers liecht verständlich, nume ä schöni Gestä u dermit schliessi.

-Diego Bircher