Ougerelikt, Seelegwand,
Bluetorange Mond,
Keiie wie der Räge us allne Wolche.
Zille verloufe vor de Ouge,
em Wasser Tou glich.
die Tinte nid Wassertouglich.
Bärgliechtlandschafte.
Es Lache zur verdrängig,
D'Fröid ganz minersiits, vorgspielt.
Glänzig, Füecht Farbefrohi Träne,
wo sich stoue, bii däre Muur vo Emotione.
Schiesse us de Ouge u nähme mii ii,
Umschlinge mini Huut, gibe se Frei,
a die Frische Luft, Tabakgschmack ir Nase, Schoggitafele Schwarz karriert ufem Tisch.
Ufer Zunge verteilt sich ds Bitter- Süess.
mini Gfüehl verfliesse ine Bach, La sä Zieh,
als hetti ä Wahl für welli i mii wett Entscheide.
Einsam u verlasse, ir Einsamkeit gfange,
Sitze da es Halbläärs Rotwiiglas u denke nah.
Es giit ä Wäg säge sii, Sii säge viel we dir Tag läng isch. Mir seits menge, mir sötts e Mengi säge, aber säge tuets mir nüd.
Es giit ä Wäg, aber de füehrt a mir verbii,
Bii wie vom Wägrand gstosse, nume Näbesächlich, köre nid derzue, wie ir Schuel.
Bini nume es Pilgerdenkmal z'Croesfeld, oder werum stahni da u wirde nid abgholt?
Bini nume es Symbol?
Füehle mii als weri ufem Jakobswäg,
Sueche mii sälber, mii Name wird usgrüeffe,
bi ii dran, gfüehlt niemer anders heisst wie ii.
Nume igs Kilometer wäg, z' Südamerika villich.
Es isch nid ganz klar woni härchumme,
zminscht mim Name geits so.
Gschwige de woni hii gah,
giits ke Garantie, was isch de scho?
Machts Sinn oder ischs Zwäcklos?
Isch's erzwunge, nach Achzg Jahr verbii oder geits witer?
Muessi jitz Schaffe dasi ner cha Fiire?
Giits ner nu öppis z'Fiire oder nume z'schaffe?
Wirdi denn säge i has gschafft oder chanis wie i mire Erste Lehr la schliffe?
Holzskulpture im Linter, göh mir düre Chopf
gschnitzt vom Johann Inniger, nume grad so? Inspiration am Wägrand, er Chander entlang.
Holzstoub entsteit, we gsaget u gschliffe wird,
Holzspän flüge, bim Hoble,
Heisst dass es giit immer Sache wo mir müesse hinder üs la, dases üs cha Forme o wes weh tuet, das mir so wärde wie mir sii?
Wes wie bi Diamante isch, fragi mii werum bini nume Kohle?
Het alls sii Priis u was wener z' höch isch?
Chani mir das leiste oder spielts ke Rolle?
Warum hett ä Mensch so e Läbensdrang?
Warum hei mir Angst vorem Tod?
Warum giits Leid?
U ja es isch leid z gseh wie Mensche wo eim nach stöh, verzwiflet Träne vergiesse u wette hälfe aber nid chöii.
Es löst ä Druck us im Härz,
Bi ii tschuld? Was chani mache?
Nimm ii Schmärz uf mii, oder füegi nume zue.
Es isch i mire Hand, oder doch nid?
Hani ä Wahl, hani ds Abstimmigsmaterial verpasst, chani nu vote?
Giits ä gueti Quote?
Es paar gueti Argumänt wo derfür oder derwieder sii?
Wie ir Schematherapie, Interview, Tunnelblick,
Vertränti Ouge Rund um mii, bi im Film, ha nüd mitübercho.
Werum chöme mir nid Träne weni so über mii dänke u Rede?
Bini so abküehlt, oder giits Hoffnig, toue ii uf?
Giits der guet Rat nume wes eim Schlächt geit so wie die meischte Floskle.
Die verleide mir u Schwimme scho dervoo im Tränemeer als were sii es Floss.

-Diego Bircher