Mikro u Makrokosmos,
Bodehuut, Bärgchnochetal,
Flussaterie, Löcherbecki,
Stouseechötti, Wasserdruck,
Mensch, Ärde, Himmel, Stärne,
Härzklappe, Bluetström,
Bluetdruck z'höch,
Serotoninmangel, Sorgefalte,
Sorge mache, Lösige schaffe.
Fluechwörter im Wortschatz,
Billigi Ware, Hochwärtig verpackt.
Mini Texte, söttsch sicher usserhalb vor Reichweiti vo Chind ufbewahre.
Mini Gedanke sii geistere, Hirngspingstig.
Überchume Chiischter vom Schreie i mii ine,
Nüd säge gäge usse, süsch würsch iigwisse.
Friede bewahre i Chriegsziite,
Liebesbriefe aa mii,
Gang ga bügle, dir isch Längwillig,
Schwüg, du bische Maa.
Sterchi, Ke Angst,
ir Dunkelheit alleini gah.
Riss dii zäme u nu der Arsch uf,
dis Wort zellt nüd,
bisch z'Jung versteisch das ee nid.
Männlichkeit, bishär unbefriedigend definiert.
Ablehnig ertönt wie es vertrouts
Musigstück im Ohr,
Ds Orchester spielt uf, es geit abwärts,
Jede Klavierton zieht mii ache,
D'Melodie verliert sich im Ohr,
Was lirisch?
D'Lyrik, liieret mi ume finger,
I verliere der Fade,
der Fade verliert sich i sich sälber,
es Gnusch entwicklet sich
Entwickle mii, es entwicklet sich,
Wikle nä ume Finger, es fallt mir ab,
als wers öppis Schwermüetigs,
Es isch doch liecht gmacht,
Wo isch ds Liecht ir Nacht.
Bringe kes Wort meh use, es Instrumental.
Ha ds Rede verlehrt u ds Schribe entdeckt,
Zieh mii zrügg, dränge mii uf, hani z'gfüehl,
Us Liechtigkeit e Last, Zollabgabe zahlt.
Ufwüehlend wie d'Stuehltherapie,
Flüge dür d'Luft, id Turbulänze ine,
Keiie ines Loch, verzieh mii ir Höhli,
Grabe mii us, ds Änd vom Winterschlaf,
ii stah uf, bii blibe liege irgendwo,
ufem Wäg Gstorbe, aber läbe nu witer.
Renne er Sunne entgäge, bi verwirrt,
mir geit ds Wasser us, Schwitze alls use,
Trinke Wasser, spöiie Füür,
überchume hie nume Fiebertröim.
Der Schatte zieht hinde nache,
Mir stockt der Atem,
er blibt chläbe im Hals, der Kloss.
Er blibt hange ir Gedankewand,
Er blibt liege im Schattegwand, Schwarz.
Nume Texte, Drama, abghackti Gedanke,
Verfliesse u verschliesse d'Türe zur Ussewält.
Z Inneläbe rebelliert, hartnäckig blibt sii dran, mini Liebi, als würds öppis Gratis gäh,
Es het nu alls kostet uf där Wält,
was mii das choschtet?
Säge mal es isch Kostbar,
fürne Normal stärbliche,
öppe wie Kornfelds Sammlig, unbezahlbar.
Nid zum Erwärb geeignet, unerreichbar.
D'Musig spielt ume anders,
Chleischtere i mir grad mini Maske als weri zrügg ir Sächste Klass,
oder bini ds erschte mal mii?
Isch das normal füehlt sich so z'läbe aa. Versueche kes dürenand z'verursache, es Gfüehlschaos, süsch bini am Änd nu Grühert
u ii bi ja e Maa, das darfi nid.
Weiss nid ganz, bii unsicher,
Bini ufer suechi nach Sinn, nacher Antwort oder er Frag, überchume Phrase, Rächesätz, Algebra für mis Hirn, chas nid zämezelle,
was isch X u was isch Normal,
Finde Antworte, nid d'Frag,
bruche Lösigswäge für z'nächscht mal,
süsch weisi nid mit was Rächne,
es Summiert sich, aber zahlt sich nid us.
Bi verlore, ha mii Gfunde, i gseh dii im Spiegel, aber i erkenne mii nid wieder.
Halluziniere i Gedanke, hange blibbe a Frage wos kenner Antworte druf z'gäh schinnt.
Lösigsstrategie, mis Ziel.
Friede für d'Seel, Fröid für ds Härz,
Ä Eierchueche füre Goume,
Chli Ahornsirup für d' Süessi härzstelle.
Es rüehrt mii, Guet u Schlächt, vermischt.
Ds ewige Kärr mitem Schmärz,
Ä Liebesbrief a Gott, folgt.
Weiss nüm wasi cha u was nid,
Konzentration nid mi sterchi, aktuell.
Es tuet Weh, de Schmärz tuet guet,
es zügt vo Läbe, i nimme das als e Fortschritt.
Es Gfüehl, e Hoffnigsschimmer ir Leeri,
Danke Gott, mini Hoffnig dis Verspräche,
Haltes i de Händ, als giebs kes Morn.
Mis Wort zum Sunntig,
I bi im Friede, Sola Fide.

-Diego Bircher