Parkiere bim 15 minute Parkplatz,
Luufe uf das unbekannte Huus zue.
"Da köreni häre für die nächschti Ziit",
Durchstriift der Gedanke, mis Hirn.
Zimmernummer 40, umgäh vo
Wisse Wend, emne Brüneli u paar Möbel.
Sitzeni da, mis Hirn füehlt sich bedäupt aa,
Warschinlech ischs bi däne Medis normal,
-hoffeni, hie der Friede z finde.
Für ds schlimmschte z verhindere.
Viel probiert, gfüehlt wenig gange.
Hie bini für ufzarbeite was vergange u für
mire Depression ufe Grund z gah. I bi us dem Grund da, dasi a dem ned z Grund gah.
Unergründbar füehlt sichs die erste Täg a, woni am Morge ufstah, -merkeni das mis Härz nem so tiifig schlett, wie volescht.
Hie isch d Endstation für mi,
Hie muessi mir igestah o nume Mensch z si, gwüssi Sache woni gärn würdi, aber nem cha, will d Chrankhiit überhand het gno.
Es isch nem Tragbar dahiime,
das isch das woni am mischte mit mir Ringe, -hani z gfüehl
u scho umi Tüschts mi.
Es ziigt mir einisch meh das Gfüehl,
gfüehlt so schnäll chönne Manipuliert u gfüehlt sii. Gfüehl si e gueti Sach aber e schlechte Leiter, willme gfüehlt nu mengs würd mache, will me z gfüehl het, grad ds richtige Gspüri z ha,
i däre Situation.
Viel Fragi u Wiishiite, viel ned gfragt u glich viel müglichi Antworte.
Tipps vo Lüüt woni ned nacher Meinig gfragt ha.
"Wasser predige u Wii trinke" isch so gengig im Wortschatz vor Gsellschaft.
Z Reflektiere hani glehrt die leschte Jahr u nume will me d Spitze vom Iisberg het gseh, isch d Iischetzig mengisch so liechtsinnig, oder eifach glich z spat cho.
Z Läbe isch ned Fair, gratuliere zu dem Schluss hets nu menge gschafft,
Das isch nüd Nüis u ja, i cha ja dankbar sii, dasi hie uf däm Egge vor Wält gebore bii.
I cha aber o nüd derfür,
-Was du hesch erläbt,
-da drüber wotti ned urteile u glubemer am beschte machschs dus umgekehrt o ned,
wills wäder Sinnvoll nu Fair wer.
Es verbirgt sig bekanntlig meh, underer Wasseroberflächi als eim Lieb isch u o we dus guet minsch u mirs wermschtens tuesch aarate, chas ihm schnäll i falsch Hals grate.
I kenne miner Charti,
U was im Stapel,
wisch du grad glich viel wie ig,
was mi nu erwartet.
Was würkli isch, chönnti nume öpper wo ganz genau Wiis, welli Charte uf wellere gstaplet, -säge was nu chunnt u wie d Situation de würkli isch.
Das isch d Hoffnig wo mir blibt, dass egal was für Charte nu uf de Tisch chömme, Igs cha näh u dermit lehre z Spiele.
I wiis dasi em inte u em andere villich uf de Füess ume zschalpe, füehl di ned ds Fest aagriffe, es isch nume mis empfinde oder sölli fairerwiis säge, mis Gfüehl
u de merksch du villich glich o d Ironie wo das ganze mit sich bringt, es isch viel halb so Wild.
Es si es paar Gedankeaastöss, wo o a mii Grichtet sii u simer ehrlig, es muess ned ging, grichtet sii, will was würkli Rächt u Urächt das söll doch de grad dä entschiede wo ds ganze Spieli, uswendig kennt.
Es paar sache si ifach wiesi sii.
Also chumm nimm diner charte will z Läbe isch z Churz für guete Wii inzig z trinke u es Spiel isch nume intressant wemes cha spiele, alls es Mitenand.

Diego Bircher