Do, Re, Mis Fass So voll u d'Schnouze oo.
Verflueche, Füehle küehlti lengscht vergässni Emotione u Ängst, wo wieder uftoue.
Alls berueht uf Gägesiitigkeit, es schouklet sich uf u verbricht ii Einzelteile.
Gfallni Engle halte mii schins gfange ir Engi.
Sorry bii grad nid so ufem Relitrip, das isch mir z'Dumm, verfluecht hani mii sälber gnue.
Die Religöse Überzügige zerstöre grad mis Gottesbild.
Ii hinderfrage u erhoffe mir d'Wahrheit z'erkenne u we se das isch, de wirds stand ha.
Ds Läbe isch der Discovery Channel,
ii Schalte um, mir löschts ab.
Tanke uf dasi nid Absuufe,
Würfes eifach mal ii Ruum wie der Kobe,
als wetti bald Abdunke, wasi nid vor ha.
Bi ke Basketballspieler wie der Bryant.
Philosophiere lieber über ds Läbe,
Das hie isch nid ds Über Läbe,
Das isch ds Überläbe, bi nu nid im Himmel.
Mir trage Näme wo üs Mensche gäbe,
Mir nähme solangs öppis z'hole giit,
Mir gäbe solangs nüd choschtet,
Mir koste ds Läbe us u d'Liebi löh mir
versalze zrügg.
Sitze aa Wiehnachte daheime u luege alleini Chriegsdokus uf Englisch.
Dunkli Gstalte wo Schwarz male, Kaffeechablse klicke, Koffein schiesst id Vene,
D'Stimme verstumme, ds Härz schlaht meh, Der Chopf beugt sich vor, d'Guillotine keit,
Mii Knickbruch, lieb dii sälber wie di nächscht.
Sitze da mis Fassigsvermöge wird usgreizt,
Es tuet guet, die Stimme wo Singe im Hindergrund, singe öppis vo Abtrünnige, Halb läbige, Läbe i däre Stadt u Fründe für immer.
Mir Liebe Läbe, Mir Liebesläbe,
Mir Liebes Briefe, Mir, Schribes Briefe,
Mir schiebes zur Siite, Mir kreiere dii Narbe, mir zeichne ds Läbe u es zeichnet üs,
mit Wunde us.
Muess viel kämpfe, Ringe mit mir u mit dir.
Ha mii Verloge u Betroge, nume ä Leeri Hülse imne Ruum voller lüüt mit volle Härze, siit 12 Jahr bini Tot u Lache glich, alls nume schinn.
Füehlt sich alls falsch aa, wie Penicilium,
Gschimmlet, aber schins gniessbar.
Es stinkt zum Himmel wie Kadaverstelle.
Houptsach du machsch mit u passisch i ds Bild, so wies die andere hei welle.
Gseh die wo brüchte, die wo gäbe, die wo Liide, die wo Versueche u die wo nähme.
Mir schleppe üs dür d'Clubs mit gueter Musig für die vermeindlich Schlächte Gfüehl los z'wärde, striehle am nächschte Sunnti id Chilche für üs la z'Vergäh, chlii Weihrouch sölls richte, Meinsch.
Blibe am Bode ständig, wie Kommode standhaft bis der Tornado mii erfasst u gäg d'Wand schlüderet.
Schlagzille wo sich ii Chopf Title, Schlag Links, Cut, Rächts, mii MMA fight z'läbe u d'Liebi.
Häbe zum viel z'vielte mal mini Backe häre,
Gseh nume, T'ouge nüd i där Gsellschaft u das wird so a mii häretrage, i sig eine vo dene.
Mir giits eine oder Zwe Schläg meh i z'Gsicht.
Wie söll ä Mensch das Läbe ertrage.
Es mir eine u ii gibe nüd zrügg.
Mir gäbe ab, Mir versäge grad,
Mir, giits nümm, es giit nu Mii, Sii u Die.
Reich mir ds Weihwasser, dasi gwäsche wirde.
Dänk dra, dini gröschti Sterchi, isch o dini gröschti schwechi, wed se nid iisetzisch.
Wünscht mir ii hätt ä Schäri wo mir die guete Ziite chönne Useschnide.
Das gseh wo mir schöns hei erläbt,
ä Schärischnitt us Lache, Freude, Träne,
Cherzegflimmer u Körperwärmi.
Ii konserviere d'Konsärvebüchse voller Dopamin für speter, häbes uf, häbe ab,
Es lächle zieht über ds Gsicht.
Schliesse Friede mitem Gedanke das Mensche ä anderi Version vo mir i ihrem Chopf bhalte.
Wett dir säge ii bi witer, villich nid so wie du wettsch aber so wie ii bi.
Möge die vergossne Träne vo letscht Jahr, üsi Same begiesse wo mir setze ii däm Jahr.
Möge die Laste wo drückt hei, ds Fundamänt sii für öppis nöis.
Hisse die Wissi Flagge, wett Friede, Stifte, Bletter, Liebi, Säge, Gschichte Schribe,
Religion nid aber Gottes Vergäbig.

-Diego Bircher