Bim Herr Bircher handlets sich umne 24 Jährige Patient, wo nachenere Stationäre Behandlig ufer Psychiatrische Station vom Spital für die witeri Stabilisierig id Tagesklinik isch iiträtte. Bim Iitritt isch ä depressivi Symptomatik im Vordergrund gstande.
Die het sich dür Konzentrationsstörig, Grüble, Gedankedränge, niedergschlageni Stimmig, Insuffizienzgfüehl, mangelnde Aatrieb, inneri Unrueh sowie dür Versagens- Zuekunftsängst zeigt. Zuesätzlich sii im Herbst 2023 zunähmend Angst u Panikattackene mit Hyperventilation beschriebe worde, wo sich ir Zuekunftsplanig hei verstercht. Die aahaltendi Suizidalität het em Herr Bircher starch z'schaffe gmacht, was ä witere Stationäre Ufenthalt het mit sich zoge.
Villich bini nid ii sondern de Herr Bircher wo obe beschriebe, villich bini ig, bini dä, füehli mig, meine das, nimme aa, gibe ab u glich nid, halte fest u glich nid, verkrampfe mii gwaltig u
stirbe langsam vor mii hii.
Villich chummi übere als würdi grad alls häreschmeisse, alls hinder mir lah u hinderfrage, natürlich keit vieles Usenand,
für ds Nüiie Läbe muess z'Alte stärbe,
wie bim Gloubensbekenntniss.
I wott Läbe u nid gah nume will ig muess i Forme passe wo anderi erschaffe.
Das woni am meischte ha hinderfragt, dä Mensch wo mir am meischte z'schaffe macht, wo die gröschte Wundene ii ds Härz het gritzt isch nid mi Best Fründ wo mii gmobbt het,
die wo mii verfluecht u verletzt hei, es bii ii.
Ii weiss dasi die andere cha Liebe,
li weiss dasi anderne cha vergäh,
li weiss dass die Wunde chönne heile wo anderi Mensche verursacht hei,
aber was isch mit mir?
Leider chömme viel z'viel Männer ufe glich Schluss wie d'Norah Vincent.
Kämpfe bis sii im Sumpf versinke.
Rede über mini Vergangeheit will i dir vertroue, am beste losisch zue, lisischs mit, nimmsches uf, schribsches ab u machsch dermit was de wosch.
Chrieg isch nid romantisch, egal öb im Chopf z'Afghanistan oder ar Russische Front, es isch u blibt hässlich.
Stell dii Links häre oder Rächts,
houptsach du entscheidsch dii für z'richtige, häb dini Meinig, säg se nume wesi er Mehrheit entspricht u wehe du wählsch dini Siite nid.
Los nume eii Meinig aa de wirsch scho wüsse was isch abgloffe u wie.
Was wes nid drum geit ä Siite uszwähle sondern z'Überläbe ä Überblick z'verschaffe u z'erkenne wo üser Gränze sii u die z'Respektiere, jede für sich?
Was we de Kampf vorer Huustür stattfindet, sii mir de nu fair, gseh mir de nu klar zwüsche Panzerchötteklapper, Landminemutte, Splittergranaterouch, Drohnesuure, Massegreberushüeb, Iischusslöcher, Verwittwete Chinder, Liicheschänder, Gwehrschusspatrone u Vergwaltigte Seele.
Mir Töte üser Härze mit Sache wo üser Ouge nid ertrage, für Sache z'übercho wo üs ke Ertrag gäh, nume meh Schmärz, Härzzerbruch u Liide für am Änd Hilflos da z'sii u üs müesse iizgestah, das die Wält sich um z'gliche dräiht wie scho immer, us mire Perspektive, Subjektiv versteit sich.
Macht, macht Machtlos.
Üsi Vorstellig isch begränzt uf Wörter wo mir kenne, Objektivität isch es Wunschdänke u Neutralität oo.
Es sii Wörter wo mir hei Übernoh, Übersetzt, Erfunde für ds Beschriebe was mir nu nid hei chönne benenne u erreiche.
Oft ischs anders als mir dänke.
Nume wills Ruehig isch, herrscht ke Friede,
Nume wills Luut isch heissts nid,
es isch alls usser Kontrolle.
Nume wills duuret, heissts nid das nüd geit u zumne Änd cha cho.
Rede über mini Vergangeheit will i dir vertroue, am beste losisch zue, lisischs mit, nimmsches uf, schribsches ab u machsch dermit was de wosch.
Wott nu chli Schribe für loszwärde was mii plaget, chli Wüsse schaffe mit Wüsseschafte,
für dases i gwüssne aafaht schaffe.
Wett nu uf Reise gah, wägg vom Alte,
wie ii Glichniss vom Nüiie u em Alte sis Testamänt.
Gseh mii bi National Geographic,
erkunde d'Wält nüii, wie Ärdkundelehrer bi Flatearththeorie.
Individue z'vergliche isch ke Fairtrade,
Einzigartigkeit wird gschetzt usser i System wo aller Glich gstellt sölle wärde, also Gsellschaftlich gseh sälte, sprich nieneh.
Vergliche füehre i d'Unglücklichkeit u id Unändlichkeit, wiit wägg vor Realität a ne Ort wo nume der Garte Eden dra häre wird cho.
Gschribes es Wärk nid verglichbar u glich us glicher Motivation wie ds Wärk vom
Erich Maria Remarque.
Z'zeige was kämpf bedüte, wie viel Schmärz mir liide, wie viel Leid mir füehle.
Mensche chömme zu mir u frage mii öb de Schmärz ändet, ii wünsches u ii flehe zu Gott.
Ii bi nu dranne , ii gibe alls bis der letscht Tropfe Bluet dür mii Körper schiesst, uf d'Ärde tropft u sich verbindet mit dem wo isch gsi.
Sitze ufem Balkon u zieh ar Zigi für d'Närve.
Villich isch ja grad de Dräck under dir der Grund das de chasch wachse.
Sälbst weni de Kampf irgendwenn verliere, wetti dir säge du bisch ä Grund gsii, dasi nu chli lenger bi blibbe.
Words Heal das chani säge.

-Diego Bircher